खास प्रतिनिधी | गोपनीय खबऱ्या
नाशिकचा पालकमंत्री कोण होणार? अशी चर्चा पुन्हा एकदा सुरू झालीय. याचं कारण आहे छगन भुजबळांनी घेतलेली मंत्रिपदाची शपथ. नाशिकच्या पालकमंत्रिपदासाठी छगन भुजबळांचं नाव आघाडीवर असल्याची चर्चा राजकीय वर्तुळात सुरू झाली आहे.छगन भुजबळांनी मंत्रिपदाची शपथ घेतल्यानंतर पुन्हा एकदा नाशिकच्या पालकमंत्रिपदाची चर्चा सुरू झालीय. गिरीश महाजन, दादा भुसेंनंतर आता छगन भुजबळ देखील पालकमंत्रिपदाच्या शर्यतीत असणार आहे. कारण गिरीश महाजन यांना नाशिकचं पालकमंत्रिपद दिल्यानंतर शिवसेना तसंच राष्ट्रवादीकडून देखील नाराजी व्यक्त करण्यात आली होती. त्यामुळे रायगडसह नाशिकचं पालकमंत्रिपदाला स्थगिती देण्यात आली होती.
मात्र, भुजबळांच्या शपथविधीनंतर भुजबळांना नाशिकचं मंत्रिपद जाणार असल्याची चर्चा राजकीय वर्तुळात सुरू झालीय.नाशिकच्या पालकमंत्रिपदावरून महायुतीत वाद सुरुय. त्यामुळे पालकमंत्रिपदाचा निर्णय अद्याप घेण्यात आलेला नाही. त्यामुळे हा निर्णय कधी मार्गी लागणार असा प्रश्न उपस्थित करण्यात येतोय. त्यात आता भुजबळांना मंत्रिपद दिल्यानंतर पालकमंत्रिपदावर तोडगा निघण्याची शक्यता वर्तवण्यात येतेय.
झी २४ तासच्या महाराष्ट्र गौरव पुरस्कार सोहळ्यात देवेंद्र फडणवीस यांनी महिन्याभरात पालकमंत्रिपदाचा तोडगा निघणार असल्याचं म्हटलं होतं. तीन पक्षांचं सरकार असल्यामुळे अडचणी निर्माण होतात असं देखील देवेंद्र फडणवीसांनी म्हटलं होतं.छगन भुजबळ मंत्री होण्याअगोदर दादा भुसे आणि गिरीश महाजनच रेसमध्ये होते. मात्र, आता भुजबळ पुन्हा मंत्रिमंडळात परतल्यामुळे ते देखील पालकमंत्रिपदाच्या रेसमध्ये आघाडीवर आहेत. तसंच देवेंद्र फडणवीसांनी महिन्याभरात पालकमंत्रिपदावर तोडगा निघणार असं म्हटलं होतं. त्यामुळे छगन भुजबळांसाठी महायुती थांबली होती. असा प्रश्न यानिमित्तानं उपस्थित होतोय.
