खास प्रतिनिधी | गोपनीय खबऱ्या
शहरातून एक अत्यंत धक्कादायक बातमी समोर आली आहे. कृष्णाघाट परिसरात २० वर्षीय तरुणाचा निर्घृणपणे खून करण्यात आल्याची घटना उघडकीस आली असून, या घटनेमुळे संपूर्ण शहरात खळबळ उडाली आहे. पोलिसांनी घटनास्थळी धाव घेत तपासाची चक्रे वेगाने फिरवली आहेत.
मृत तरुणाचे नाव चैतन्य सुहास तोरणे (वय २०, रा. टिंबर एरिया, सांगली) असे आहे. घटनेची माहिती मिळताच सांगली शहर पोलीस आणि स्थानिक गुन्हे अन्वेषण शाखेचे पथक तातडीने घटनास्थळी दाखल झाले.
हा खून नेमका कोणी आणि कोणत्या कारणातून केला, याबाबत अद्याप स्पष्टता आलेली नाही. मात्र, संशयितांचा शोध घेण्यासाठी सांगली शहर पोलीस आणि स्थानिक गुन्हे अन्वेषण शाखेची विशेष पथके रवाना करण्यात आली आहेत.
घटनास्थळी पोलीस अधीक्षक तुषार दोषी, अपर पोलीस अधीक्षक कल्पना बारवकर, उपविभागीय पोलीस अधिकारी संदीप भागवत, स्थानिक गुन्हे अन्वेषण शाखेचे पोलीस निरीक्षक संजीव झाडे व त्यांचे पथक, तसेच सांगली शहर पोलीस निरीक्षक अरुण सुगावकर यांच्यासह वरिष्ठ अधिकारी उपस्थित होते.
या खून प्रकरणाचा अधिक तपास सुरू असून, खुनामागील नेमके कारण आणि आरोपींचा शोध घेण्यासाठी पोलिसांकडून युद्धपातळीवर तपास सुरू असून आरोपींच्या शोधासाठी तपास पथके रवाना करण्यात आली आहेत.
