खास प्रतिनिधी | गोपनीय खबऱ्या
मिरज शहर व परिसरात अवैध धंद्यांना ऊत आला असून अती तातडीने कारवाई करीत पायबंद घालावा, या मागणीचे निवेदन महाराष्ट्र नवनिर्माण सेनेच्या मिरज शहर व तालुका पदाधिकाऱ्यांकडून शहर पोलीस ठाण्याचे पोलीस निरीक्षक किरण रासकर यांना देण्यात आले.
निवेदनात म्हटले आहे की, मिरज शहर व तालुका परिसरात मटका, जुगार, क्लब, कॅसिनो व इतर अवैध धंदे मोठ्या प्रमाणात दिमाखात, खुलेआम सुरू आहेत. यामध्ये अल्पवयीन व तरुणवर्ग अक्षरशः बरबाद झाला आहे. कुटुंब उध्वस्त होत आहेत. हे कुठेतरी थांबले पाहिजे, यासाठी मनसेने इशारा दिलाय.
अवैध धंदे बंद करण्याऐवजी आणि त्यावर कठोर कारवाई न करता त्यास पोलिस प्रशासनाकडून मूक संमती दिली जात आहे. पोलिस प्रशासनातील वरिष्ठ अधिकाऱ्यांनी याकडे गांभीर्याने लक्ष देऊन हे अवैध धंद्यांचे अड्डे उध्वस्त केले पाहिजेत. पोलिसांकडून काही दिवसांत असे न झाल्यास मिरज मार्केट परिसरात मोठ्या एलइडी स्क्रीनवर ‘लाव रे तो व्हिडिओ ‘ या मनसेच्या बहुचर्चित स्टाईलने मिरजकर नागरिकांना चित्रफितीद्वारे हा सर्व प्रकार दाखवण्यात येईल. यामध्ये मिरज शहर व परिसरात सुरू असलेल्या अड्ड्यांची व अवैध धंदे याची सविस्तर ठिकाणासहीत माहिती देण्यात आली आहे.
शिवाय, पोलिसांनी याला पायबंद घातला नाही तर जागोजागी सुरू असणाऱ्या अवैध धंद्याचे अड्डे मनसैनिक उधळून लावतील. असा इशारा मनसेचे शहर पदाधिकारी विठ्ठल शिंगाडे व तालुका अध्यक्ष प्रकाश साळुंखे यांनी दिला आहे.
