जम्मू आणि काश्मीरमध्ये नियंत्रण रेषेवर (एलओसी) पाकिस्तानी सैन्याने केलेल्या गोळीबारात शहीद झालेल्या भारतीय जवानाच्या सर्वोच्च बलिदानाची व्हाईट नाईट कॉर्प्सने बुधवारी रात्री अधिकृत माहिती दिली.
बुधवारी पहाटे झालेल्या गोळीबारात ५ व्या फील्ड रेजिमेंटचे लान्स नाईक दिनेश कुमार शहीद झाले.
जवानाच्या मृत्यूची अधिकृत माहिती देताना, व्हाईट नाईट कॉर्प्सने सोशल मीडिया प्लॅटफॉर्म एक्सवर पोस्ट केले की, “जीओसी आणि व्हाईट नाईट कॉर्प्सचे ऑल रँक ५ व्या फील्ड रेजिमेंटचे लान्स नाईक दिनेश कुमार यांच्या सर्वोच्च बलिदानाला सलाम, त्यांनी ७ मे २५ रोजी पाकिस्तानी सैन्याच्या गोळीबारात आपले प्राण गमावले.”
६ मे च्या रात्री पाकिस्तानी सैन्याने पूंछ, तंगधार आणि इतर सीमावर्ती नागरी भागात गोळीबार सुरू केला, जो ७ मे पर्यंत सुरू होता. या जोरदार गोळीबारामुळे घरांचे मोठे नुकसान झाले, अनेक रहिवाशांना पळून जावे लागले आणि अनेक लोक जखमी झाले आहे. याचबरोबर १३ नागरिकांचाही मृत्यू झाला आहे.
गोंधळ असूनही, पहलगाममधील अलिकडच्या दहशतवादी हल्ल्याला प्रत्युत्तर म्हणून पाकिस्तान आणि पाकव्याप्त जम्मू आणि काश्मीर (पीओजेके) मधील दहशतवादी तळांना लक्ष्य करणाऱ्या भारतीय सैन्याच्या ऑपरेशन सिंदूरला स्थानिकांनी जोरदार पाठिंबा दिला आहे.
ऑपरेशन सिंदूरच्या माध्यमातून लष्करी कारवाई झाल्यानंतर, पाकिस्तानने बुधवारीही युद्धबंदीचे उल्लंघन केले, नागरी भागात गोळीबार केला आणि नागरिकांमध्ये भीती निर्माण केली.
संरक्षण सूत्रांनुसार, ६ आणि ७ मे च्या रात्री पाकिस्तानने नियंत्रण रेषेवरील आणि आंतरराष्ट्रीय सीमेवरील चौक्यांवरून तोफगोळ्यांचा जोरदार मारा केला. या कारवाईनंतर पूंछ आणि राजौरी सेक्टरमध्येही सतत गोळीबार सुरू असल्याचे वृत्त आहे.
१५ नागरिकांचा मृत्यू
एका स्थानिक नागरिकाने सांगितले की, “आम्ही हे ठिकाण सोडणार नाही. भारतीय सैन्याला आमचा कायम पाठिंबा राहील. आजही युद्धबंदीचे उल्लंघन होऊ शकते. ऑपरेशन सिंदूर योग्य प्रत्युत्तर आहे. आम्ही महिला आणि मुलांना येथून पाठवले आहे, परंतु पुरुष इथेच थांबणार आहेत.”
संरक्षण सूत्रांनी दिलेल्या माहितीनुसार, काल रात्रीपासून पाकिस्तानी सैन्याने केलेल्या गोळीबारात १५ नागरिकांचा मृत्यू झाला आहे आणि ४३ जण जखमी झाले आहेत.
