खास प्रतिनिधी | गोपनीय खबऱ्या
इनाम धामणी (ता. मिरज) येथील बत्तीस माग कारखान्याजवळ चालणाऱ्या तीनपानी जुगार अड्ड्यावर एलसीबीच्या पथकाने छापा टाकला. या कारवाईत सहा जणांना ताब्यात घेतले असून दिग्विजय सुभाष श्रीरंबेकर (रा. मौजेडिग्रज), महेश जिन्नू बिरणे, अक्षय राजेंद्र भोसले, अच्युत गोपाळ नाईक, सुहास कृष्णा कोळी व सतीश महावीर पाटील (सर्व रा. इनामधामणी) अशी त्यांची नावे आहेत. त्यांच्याकडून सहा मोबाईल, ३ मोटारसायकली, रिक्षासह इतर साहित्य असा २ लाख ५७ हजार रुपयांचा मुद्देमाल जप्त करण्यात आला.
पोलिस अधीक्षक संदीप घुगे यांनी जिल्ह्यातील अवैध धंद्यांवर कारवाईचे आदेश दिले आहेत. त्यानुसार एलसीबीचे निरीक्षक सतीश शिंदे यांच्या नेतृत्वाखाली खास पथक तयार करण्यात आले आहे. पथकातील पोलिस मिरज विभागात गस्तीवर होते. त्यावेळी इनामधामणी येथे बंद पडलेल्या माग कारखान्याजवळ असणाऱ्या सम्मेद पाटील यांच्या जुन्या घराच्या वरच्या मजल्यावर बेकायदेशीरपणे तीनपानी जुगार खेळला जात आहे, अशी माहिती पथकाला मिळाली.
त्यानुसार उपनिरीक्षक कुमार पाटील, अरुण औताडे, संकेत मगदूम, अतुल माने, श्रीधर बागडी, सुशिल मस्के, सुमित सूर्यवंशी, ऋतुराज होळकर यांनी इनाम धामणी येथे छापा टाकला. त्यावेळी संशयित मिळून आले. संशयितांना पळून जाण्याची संधी न देता ताब्यात घेण्यात आले. याबाबत सांगली ग्रामीण पोलिस नोंद झाली आहे. पोलिस अधिक तपास करत आहेत. जिल्ह्यात अवैध धंदे खपवून घेतले जाणार नाहीत. कारवाईचा बडगा उगारला जाईल, असा इशारा पोलिस अधीक्षक संदीप घुगे यांनी दिला आहे.
