-
खास प्रतिनिधी | गोपनीय खबऱ्या
अमली पदार्थांविरोधात पालकमंत्री चंद्रकांत पाटील यांनी स्थापन केलेल्या टास्क फोर्सने कारवाईचा धडाका सुरूच ठेवला असून आज इस्लामपूरजवळील ओझर्डे ते घबकवाडी रस्त्यावरील कुंभार वस्ती परिसरातून ८ लाख ४० हजार २५० रुपयांचा २७ किलो ९२५ ग्रॅम गांजा एलसीबीच्या पथकाने जप्त केला.
दरम्यान, याप्रकरणी तिघांना अटक केली आहे. सुनील रामचंद्र कुंभार (वय २८, ऐतवडे खुर्द, ता. वाळवा), सुजय बबन खोत (३४, खोत मळा, आष्टा) आणि परशुराम सिद्धलिंग पोळ (३४, पोळ गल्ली आष्टा) अशी संशयितांची नावे आहेत.
पोलिसांनी दिलेली माहिती अशी ः संशयित सुनील कुंभार हा सुजय खोत आणि परशुराम पोळ यांच्याकडून तयार गांजा घेण्यासाठी कुंभार वस्ती येथे येणार असल्याची माहिती एलसीबीच्या पथकास मिळाली. त्यानुसार पोलिसांनी परिसरात सापळा लावला. काही वेळाने तिघे जण कुंभार वस्ती येथे एका शेतात असणाऱ्या उसाच्या वाड्याच्या गंजीपाशी थांबले.
त्यातील एकाने गंजीखाली लपविलेल्या पांढऱ्या रंगाची गोणी काढली. त्याच वेळी पोलिसांनी ताब्यात घेतले. पोलिस चौकशीत सुनील कुंभार याने संशयित सुजय व परशुराम याच्याकडून तयार गांजा खरेदीसाठी आल्याची कबुली दिली. त्यामुळे संशयित दोघांकडे केलेल्या चौकशीत त्यांनी नामदेव तेलंग (राजमंडरी, हैदराबाद) याच्याकडून गांजा आणल्याचे सांगितले.
पोलिसांनी संशयितांकडून गांजा, रोख २ हजार ५०० रुपये हस्तगत केले. इस्लामपूर पोलिस ठाण्यात गुन्हा दाखल करण्यात आला आहे. संबंधितांवर गुंगीचे औषधी द्रव, मनोव्यापार परिणाम करणारे अधिनियमान्वये गुन्हा दाखल केला आहे. पोलिस निरीक्षक सतीश शिंदे यांच्या नेतृत्वाखाली सहायक निरीक्षक जयदीप कळेकर, पंकज पवार, नितीन सावंत यांच्या पथकानेकारवाई केली.
