मिरज ब्रेकिंग | दारूची टिप पोलिसांना दिल्याच्या कारणावरून दोन गटात हाणामारी

• मिरज प्रतिनिधी | गोपनीय खबऱ्या

मिरज तालुक्यातील करोली (एम) गावांत अवैध दारू विक्री सुरू आहे. एकाच गावात दोन वेगवेगळ्या ठिकाणी देशी दारूच्या बाटल्यांची खुलेआम विक्री सुरू असल्याने मिरज ग्रामीण पोलिसांनी दारू विक्री अड्ड्यावर छापा टाकला. परंतु, “माझ्या दुकानात दारू मिळते याची टिप पोलिसांना तूच दिलीस”, असे म्हणत दोन गटात तुफान हाणामारी झाली. हाणामारीचे रूपांतर वाढल्याने लोखंडी पात्याचे कोयते, दगड व खुरपे हातात घेऊन एकमेकांच्या शरीरावर जखमा करण्यात आल्याचे पोलिसांकडून सांगण्यात आले.

पोलिसांकडून मिळालेली अधिक माहिती अशी की, करोली (एम) या गावांत महेश बयाजी पाटोळे व श्रीकांत बाबुराव चव्हाण हे दोघेही देशी दारू व हातभट्टी विक्री करतात. मिरज ग्रामीण पोलिसांनी दारू विक्री करणाऱ्या इसमावर कारवाई करताच, एकमेकांना जाब विचारत, गैरसमज करून, पोलिसांना टिप दिल्याच्या रागातून हाणामारी केली.

याप्रकरणी परस्परविरोधी गुन्हा दाखल करण्यात आला असून पोलिसांनी भारतीय न्याय संहिता कलम ११८(१), ११५(२), ३२४(३)(५) व १९०, १९१(२)(३) नुसार मिरज ग्रामीण पोलिस ठाण्यात एकमेकांविरोधात गुन्हे दाखल केले आहेत. याचा अधिक तपास हेड कॉन्स्टेबल ४०७ कांबळे हे करीत आहेत.