- सांगली प्रतिनिधी | गोपनीय खबऱ्या
बेडग (ता. मिरज) ग्रामपंचायतीत एप्रिल २०२२ ते नोव्हेंबर २०२२ या ८ महिन्यांत बाजार करात भ्रष्टाचार झाल्याचे उघड झाले. तत्कालीन सरपंच रुपाली शिंदे व ग्रामसेवक एम. पी. कांबळे व बी. एल. पाटील यांच्याकडून ४७ हजार ५९२ रुपये अपहाराची रक्कम वसूल करण्याचे आदेश सांगली जिल्हा परिषदेच्या मुख्य कार्यकारी अधिकारी तृप्ती धोडमिसे यांनी दिलेत.
एप्रिल ते नोव्हेंबर २०२२ या कालावधीत बाजार कर रकमेत अपहार झाल्याची तक्रार विद्यमान सात सदस्यांनी जिल्हा परिषदेकडे केली. त्याच्या चौकशीचे आदेश मुख्य कार्यकारी अधिकारी तृप्ती धोडमिसे यांनी दिले होते. त्यानुसार वाळवा पंचायत समितीच्या उपअभियंत्यांनी चौकशी करून अहवाल जिल्हा परिषदेकडे दिला. त्यात तत्कालीन सरपंच व दोन ग्रामसेवकांकडून बाजार कराची रक्कम ग्रामपंचायत कार्यालयात भरली नसल्याचे ताशेरे ओढले होते. त्यानुसार कारवाई सुरू असल्याने अपहार झाला होता, हे सिद्ध झाले आहे.
ही रक्कम वसूल करण्यासाठी कैलास पाटील, गौतम नागरगोजे, विष्णू पाटील, भाग्यश्री खाडे, शुभांगी सूर्यवंशी, जयश्री कांबळे व जयश्री शेळके या सात सदस्यांनी जिल्हा परिषदेसमोर एकदिवसीय लाक्षणिक उपोषण केले.
त्यानंतर धोडमिसे यांनी तत्कालीन ग्रामसेवक मधुकर कांबळे यांच्याकडून ८ हजार ९२४ रुपये व बी. एल. पाटील यांच्याकडून १४ हजार ८८३ रुपये व तत्कालीन लोकनियुक्त सरपंच रुपाली दिनेश शिंदे यांच्याकडून २३ हजार ७९५ रुपये वसूल करण्याचे आदेश दिलेत. जमा झालेली रक्कम ग्रामनिधीत वापरण्याची मागणी ग्रामपंचायत सदस्य कैलास पाटील यांनी केली आहे.
- एका ग्रामसेवकाने रक्कम भरली
तत्कालीन ग्रामसेवक एम. पी. कांबळे यांनी त्यांच्यावर जबाबदारी निश्चित केलेली रक्कम भरली आहे. तत्कालीन ग्रामसेवक बी. एल. पाटील यानी आदेश मिळाला नसल्याचे सांगितले. सरपंच रूपाली शिंदे काय करणार, याकडे सर्वांचे लक्ष लागून आहे.
