- कुपवाड प्रतिनिधी | गोपनीय खबऱ्या
शहरातील सूतगिरणी ते कुपवाड एमआयडीसी जकात नाका या मुख्य रस्त्याच्या दोन्ही बाजूला असलेल्या अतिक्रमणावर अखेर सोमवारी जेसीबी चालविण्यात आला. अतिक्रमणविरोधी पथकाने पोलिस बंदोबस्तात रस्त्यावरील व फूटपाथवरील अतिक्रमणे काढल्याने नागरिकांनी समाधान व्यक्त केले.
अतिक्रमणविरोधी पथकाने रस्त्यावर राडारोडा करणार्या विक्रेत्यांकडून दहा हजारांचा दंड वसूल केला. तीन हातगाडे, डिजिटल फलक जप्त केले, अशी माहिती सहायक आयुक्त सचिन सागावकर यांनी दिली. सहायक आयुक्त सागावकर म्हणाले, जिल्हाधिकारी अशोक काकडे, आयुक्त तथा प्रशासक शुभम गुप्ता यांच्या आदेशानुसार महापालिकेच्या अतिक्रमण निर्मूलन पथकाने कुपवाड शहरातील वसंतदादा सूतगिरणी ते कुपवाड एमआयडीसी जकात नाका या मुख्य रस्त्याच्या दोन्ही बाजूला असलेली विविध अतिक्रमणे हटविली. रस्त्यावर राडारोडा करणार्या दोघांकडून दहा हजारांचा दंड वसूल केला.
काही व्यावसायिकांची दुकानासमोर व खोक्यासमोर असलेली अतिक्रमणे दोन दिवसात काढून घेतली जातील, असे आश्वासन व्यापारी संघटनेचे अध्यक्ष बिरू आस्की यांनी महापालिका प्रशासनाला दिले. उपायुक्त वैभव साबळे यांच्या मार्गदर्शनाखाली अतिक्रमणविरोधी विभागाचे प्रमुख दिलीप घोरपडे, सहायक आयुक्त सचिन सागावकर, मुख्य स्वच्छता अधिकारी अनिल पाटील, स्वच्छता निरीक्षक सिद्धांत ठोकळे, गणेश धोत्रे, अंजली कुदळे, बांधकाम शाखा अभियंता अशोक कुंभार आदींनी भाग घेतला होता.
- व्यापारी संघटनेकडून सहकार्याचे आश्वासन
शहरातील मुख्य रस्त्यावरील फूटपाथवर असलेली विविध अतिक्रमणे काढण्यात आली. अतिक्रमणविरोधी पथकाच्या कारवाईची माहिती मिळताच काही व्यावसायिकांनी स्वतःहून अतिक्रमणे काढून घेतली. यावेळी कुपवाड शहर व्यापारी संघटनेचे अध्यक्ष बिरू आस्की, माजी अध्यक्ष अनिल कवठेकर व व्यापारी संघटनेने महापालिका प्रशासनाला सहकार्य केले.
