मिरज प्रतिनिधी | महापालिकेच्या मिरज कार्यालयातील पाणीपुरवठा विभागातील पाईप निरीक्षक स्वप्निल आवळे यांना दगडाने मारहाण करण्यात आली. याप्रकरणी संशयित अजित पाथरुट (वय 30, रा. मिरज) याच्याविरुद्ध मिरज शहर पोलिस ठाण्यात गुन्हा दाखल झाला आहे. या घटनेच्या निषेधार्थ महापालिकेच्या कर्मचार्‍यांकडून निषेध व्यक्त करण्यात आला.
आगामी रमजान ईदच्या पार्श्वभूमीवर शहरातील पाणी पुरवठ्याच्या नियोजनासाठी पाणी पुरवठा विभागातील कर्मचार्‍यांचे मिरज विभागीय कार्यालयात काम सुरू होते. यावेळी स्वप्निल आवळे तेथे उपस्थित होते. यावेळी नशेत असणारा अजित त्या ठिकाणी आला. त्याने ‘तुमची खूप नाटकं सुरू आहेत’, असे म्हणत स्वप्निल यांच्या डोक्यात दगड घालून गंभीर जखमी केले. अचानक झालेल्या हल्ल्यात स्वप्निल गंभीर जखमी झाले. त्यांना कर्मचार्‍यांनी तातडीने मिरज शासकीय रुग्णालयात दाखल केले. याप्रकरणी अजित याच्याविरुद्ध मिरज शहर पोलिसांनी गुन्हा दाखल केला आहे.
