कुपवाड शहर – खास प्रतिनिधी | कुपवाड एमआयडीसी भागातील शहराच्या मध्यवर्ती ठिकाणी असणाऱ्या शेती संदर्भातील औषध निर्माण करणाऱ्या एका कंपनीत २७ वर्षीय तरुण परप्रांतीयाचा खून झाल्याची घटना आज बुधवारी (दि. २९) रोजी सकाळी उघडकीस आली आहे.
घटना स्थळावरून मिळालेली प्राथमिक माहिती अशी की, शेती संदर्भातील औषध निर्माण करणाऱ्या कंपनीमध्ये कामगारांना राहण्याकरिता दोन खोल्या आहेत. यामध्ये परप्रांतीय कामगारांच्यात रात्री वादावादी झाली. एकमेकांना मारहाणही करण्यात आली. घटनास्थळी जेवणाची भांडी सुद्धा पडलेली होती. रात्री दारूच्या नशेत २७ वर्षीय सहकाऱ्याला मारहाण केल्यानंतर त्याचा मृत्यू झाला असल्याची कबुली देत दोन परप्रांतीय संशयित हे सकाळी कुपवाड एमआयडीसी पोलीस ठाण्यात स्वतः गुन्हा केल्याचे सांगत गेले असल्याची माहिती प्रत्यक्षदर्शी असणाऱ्यांनी गोपनीय खबऱ्याला दिली.
सध्या कंपनीच्या आवारात कुपवाड पोलीस दाखल झाले असून घटनास्थळाचा पंचनामा सुरू आहे. तर मदतकार्यासाठी आयुष हेल्पलाइन टीम सुद्धा कार्यरत आहे.
