सांगलीच्या जत विधानसभा मतदारसंघातून भाजपचे नेते आणि माजी सभापती तमनगौडा रवीपाटील यांनी आपला उमेदवारी अर्ज दाखल केला आहे. माजी आमदार विलासराव जगताप यांच्यासह प्रमुख कार्यकर्त्यांच्या उपस्थितीत तमनगौडा रवी पाटील यांनी आपली उमेदवारी दाखल केली आहे.
विधानसभा निवडणुकीत यंदा बंडखोरीचे प्रमाण वाढले आहे. त्यानुसारच जतमध्ये देखील बंडखोरी समोर आली आहे. भाजपकडून उमेदवारी न मिळाल्यास प्रसंगी अपक्ष निवडणूक लढवणार; अशी भूमिका तमणगौडा रवीपाटील यांनी जाहीर केली आहे. भाजपकडून आमदार गोपीचंद पडळकर यांना जतमधून उमेदवारी मिळण्याची दाट शक्यता आहे. यामुळे भूमिपुत्र विरुद्ध आयात असा संघर्ष जत विधानसभा मतदारसंघात निर्माण झाला आहे. यातून स्थानिक भाजप इच्छुक उमेदवारांनी बंडखोरीची थेट इशारा दिला होता.
त्यानुसार रवी पाटील यांनी आपली उमेदवारी दाखल केली आहे. यामुळे पडळकर यांना उमेदवारी दिल्यास या ठिकाणी भाजपमध्ये बंडखोरी अटळ असल्याची स्थिती तमनगौडा रवी पाटील यांच्या उमेदवारी अर्ज दाखलमुळे निर्माण झाली आहे. आता भाजप बंडखोरीच्या अनुषंगाने काय निर्णय घेणार हे पाहणे महत्वाचे ठरणार आहे.
