गोपनीय खबऱ्या – गणेशोत्सवात काढण्यात येणाऱ्या मिरवणुकांमध्ये लेसर लाईट लावल्यामुळे डोळे खराब होत आहेत. डोळे खराब झालेले रुग्ण उपचारासाठी रुग्णालयात दाखल होत आहेत.त्यामुळे मिरवणुकीमध्ये लेसर लाईट लावू नयेत, असे आवाहन नेत्रतज्ज्ञ डॉ. अमेय कुलकर्णी यांनी केले आहे.
डॉ. कुलकर्णी म्हणाले, गेल्या वर्षभरामध्ये डोळे खराब झाल्याने
सांगली जिल्ह्यातील ३० नेत्र तज्ज्ञांकडे उपचारासाठी आलेल्या रुग्णांची संख्या ही ८० होती. केवळ मिरवणुकीमध्ये लेसर लाईट लावल्यामुळे त्यांचे डोळे खराब झाल्याची नोंद आहे. आता जिल्हा प्रशासनाने मिरवणुकीमध्ये लेझर लाईटला बंदी घातली आहे. याबाबत कायदेशीर कारवाई करण्याचाही इशारा प्रशासनाने दिला आहे.
गणेशोत्सव सुरू झाल्यानंतर लेसर लाईटचा वापर केला गेला. या लेसर लाईटमुळे मिरजेत डोळे खराब झालेले रुग्ण उपचारासाठी येत आहेत. मिरजेत दोन दिवसांपूर्वी निघालेल्या मिरवणुकीमध्ये लेझर लाईटचा प्रकाश डोळ्यांवर पडल्याने एका तरुणाचा डोळा खराब झाला, आता तो तरुण उपचारासाठी रुग्णालयात दाखल झाला. त्याच्यावर उपचार सुरू आहेत.
