सांगली हादरली : जेलमधून बाहेर आलेल्या गुन्हेगाराने १४ वर्षांच्या मुलीवर केला लैंगिक अत्याचार, गुन्हा दाखल : तातडीने आरोपी अटक.

• राज्यात वाढल्या अत्याचाराच्या घटना, प्रशासनाचा वचक संपला..?

बदलापूरमधल्या भयंकर घटनेनंतर राज्याच्या विविध भागातून महिलांवर, अल्पवयीन मुलींवर जबरी अत्याचार होत असल्याच्या घटना समोर येऊ लागल्या आहेत. सांगलीतही असाच एक प्रकार उघडकीस आला आहे.

पोलिसांनी संजय माने या कुख्यात गुंडाला या प्रकरणी अटक केली आहे. माने हा अट्टल गुन्हेगार असून 2011 साली झालेल्या खुनाच्या प्रकरणात त्याला 14 वर्षांच्या तुरुंगवासाची शिक्षा सुनावण्यात आली आहे. सांगलीतील प्रिया हॉटेलसमोर एक खून झाला होता, याच प्रकरणात संजयला ही शिक्षा झाली आहे. संजयला पॅरोल मंजूर झाला होता, ज्यामुळे तो बाहेर आला होता बाहेर येताच त्याने भयंकर कृत्य केले आहे.

गेल्या महिन्यात पॅरोलवर बाहेर आलेल्या संजयने 14 वर्षांच्या एका मुलीला ‘तू मला आवडतेस’ म्हणून त्रास देण्यास सुरुवात केली होती. घडल्या प्रकारामुळे ही मुलगी प्रचंड घाबरली होती. तिने हा प्रकार घरच्यांना सांगितला नव्हता. यानंतर 23 ऑगस्ट रोजी संजयने या मुलीला एका ठिकाणी बोलावले आणि तिथून तिचे अपहरण करून त्याने स्वत:च्या घरी नेले. तिथे त्याने या मुलीवर लैंगिक अत्याचार केला. या प्रकाराबाबत कोणाला सांगितलंस तर ठार मारेन अशी धमकीही त्याने दिली होती.

हा प्रकार पीडितेने तिच्या आईला सांगितल्यानंतर तिने पोलिसांत तक्रार दाखल केली. ही तक्रार मिळताच पुढच्या दीड तासात पोलिसांनी संजयला शोधून काढत अटक केली. या घटनेचे राजकीय पडसाद उमटण्यास सुरुवात झाली असून भाजपच्या कार्यकर्त्यांनी संजय याच्याविरोधात फास्ट ट्रॅक कोर्टात खटला चालवण्यात यावा आणि त्याला फाशीची शिक्षा देण्यात यावी अशी मागणी केली आहे.