सांगली प्रतिनिधी | खबऱ्या ऑनलाईन – मिरज विधानसभा मतदारसंघ हा मुळ शिवसेनेचा आहे, त्यासाठी नेहमीच आम्ही मित्रपक्षांसहित वरिष्ठांसोबत समन्वय व संपर्क करीत आलो आहे. मिरज विधानसभा मतदारसंघ युतीमध्ये शिवसेना शिंदे गटाला देण्यात यावा, अशी मागणी येथील कार्यकर्त्यांनी केली आहे. यासाठी शिवसेनेचे संपर्कप्रमुख राजेश क्षीरसागर यांच्या माध्यमातून राज्याचे मुख्यमंत्री एकनाथ शिंदे यांची भेट घेणार असल्याचे शिवसेना युवा जिल्हाप्रमुख सचिन कांबळे यांनी सांगितले. मिरजेत झालेल्या पत्रकार परिषदेत त्यांनी याबाबत माहिती दिली. यावेळी शिवसेनेचे पदाधिकारी उपस्थित होते. भाजपच्या वरिष्ठ नेत्यांचीही यासंदर्भात भेट घेणार असल्याचे त्यांनी सांगितले.
यावेळी युवा सेना जिल्हाप्रमुख सचिन कांबळे, महिला आघाडीच्या संपर्कप्रमुख सुनिता मोरे, रावसाहेब घेवारे, प्रभाकर कुरळपकर, उमाकांत कार्वेकर, मतीन काजी, मल्लू पाटील, राणी कमलाकर, नानासाहेब शिंदे यांच्यासह शिवसेनेच्या विविध शाखांचे पदाधिकारी व कार्यकर्ते उपस्थित होते.
याबाबत बोलताना सचिन कांबळे म्हणाले की, सन १९९५, १९९९ व २००४ या विधानसभा निवडणुका मिरज मतदार संघातून शिवसेनेच्या उमेदवाराने लढविल्या आहेत. यावेळी त्यांना लक्षणीय मते मिळाली आहेत. मिरज विधानसभा मतदारसंघांमध्ये बाळासाहेब ठाकरे यांच्या विचारांचा मतदार मोठ्या संख्येने आहे.
सन २००९ मध्ये झालेल्या निवडणुकीत युतीमध्ये शिवसेनेने मोठ्या मनाने मिरज विधानसभा मतदारसंघ भाजपला दिला. आता भाजपने तो मतदार संघ शिवसेनेसाठी सोडावा. या ठिकाणी शिवसेनेने निवडणूक लढवावी अशी कार्यकर्त्यांची भावना आहे. मुख्यमंत्री एकनाथ शिंदे यांना भेटून याबाबत मागणी करणार आहे. निश्चितच हा मतदार संघ शिवसेना लढवेल, असा विश्वास सचिन कांबळे आणि पदाधिकारी व कार्यकर्त्यांनी व्यक्त केला.
