Big breaking | MD Drug Sangli Connection : कवठेमहांकाळ प्रतिनिधी | खबऱ्या ऑनलाईन – सांगली जिल्ह्यातील कवठेमहांकाळ तालुक्यातील इरळी गावामध्ये मुंबई गुन्हे शाखेच्या पोलिसांनी छापा मारला आहे. या गावामध्ये एमडी ड्रग्जचं कनेक्शन असल्याचा पोलिसांना संशय आल्याने त्यांनी धडक कारवाई करण्याचे धाडस दाखवत ही कारवाई करण्यासाठी पावले उचलली आहेत.
सांगली जिल्ह्यातल्या कवठेमहांकाळ तालुक्यातील इरळी गावामध्ये रविवारी रात्री पोलिसांनी छापा टाकला. मुंबई पोलिसांच्या गुन्हे शाखेने ही कारवाई केल्याची माहिती मिळत आहे. गावामध्ये एमडी ड्रग्ज बनवलं जात असल्याचा संशय असून येथे मोठा कारखाना असल्याचाही सुगावा पोलिसांना लागल्याचं सांगितलं जात आहं. याची गोपनीय माहिती ‘खबऱ्या‘ने पोलिसांनी दिली आहे.
या कारवाईबाबत पोलिसांनी मात्र मोठी गोपनीयता बाळगली आहे. सांगलीमध्ये यापूर्वीदेखील ड्रग्जशी संबंधित ठिकाणांवर पोलिसांनी छापेमारी केली होती. आता पुन्हा एकदा ड्रग्जचं सांगली कनेक्शन पुढे आल्याने आश्चर्य व्यक्त होत आहे.
मागच्या काही महिन्यांपासून पुणे आणि परिसरात ड्रग्जचे साठे सापडत आहेत. त्यामुळे देशभरातील ड्रग्जचं कनेक्शन पुढे आलेलं होतं. यात हजारो कोटी रुपयांचं ड्रग्ज पोलिसांना मिळून आलेलं आहे. आता पुन्हा सांगली कनेक्शन पुढे आल्याने तिथे किती साठा सापडतो, यासाठी पोलिसांचे हे ऑपरेशन सुरू आहे. जवळपास स्थानिक पोलिसांनाही याची कल्पना नव्हती.
कवठेमंकाळ पोलीस ठाण्याचे अधिकारी, कर्मचारी व सांगली पोलिसांचा गुप्त विभाग नेमकं काय करतोय..? याबाबतीत उलटसुलट चर्चा आता सर्वत्र होऊ लागली आहे.
