सांगली -कोल्हापूर प्रतिनिधी | खबऱ्या ऑनलाईन – ‘पिनॉमिक ट्रेडर्स आणि डेव्हलपर्स व पिनॉमिक व्हेंचर्स एल. एल. पी कंपनी’ विरोधात गुंतवणूकदारांनी फिर्याद दाखल केली आहे.
फिर्यादीच्या अनुषंगाने केलेल्या तपासात कोणती प्रगती केली याची माहिती देण्यासाठी आर्थिक गुन्हा अन्वेषण विभागाने प्रतिज्ञापत्र दाखल करण्याचे आदेश उच्च न्यायालयातील न्यायमूर्ती रेवती मोहिते डेरे व न्यायमूर्ती मंजूषा देशपांडे यांनी आज दिले.
२०२३ साली सांगली शहर पोलिस ठाण्यात कंपनी व त्यांचे संचालक विपुल पाटील, पंकज पाटील व इतरांवर गुन्हा नोंद झाला होता. तसेच तो गुन्हा सांगली जिल्हा आर्थिक गुन्हा अन्वेषण शाखेकडे पुढील तपासासाठी वर्ग झाला. त्याच सुमारास येथील शाहूपुरी पोलिस ठाण्यात सुद्धा या कंपनीच्या विरोधात गुन्हा नोंद झाला. त्याचा तपास सुरू आहे; परंतु हा तपास समाधानकारक नाही. तो तपास एसआयटी स्थापन करून करावा किंवा राज्य गुन्हा अन्वेषण शाखेकडे वर्ग करावा यासाठी याचिकाकर्त्यांनी ही याचिका उच्च न्यायालयात दाखल केली आहे.
सुनावणीत सरकारी वकिलांनी कंपनीच्या सुमारे २७ मालमत्ता जप्त केल्याची माहिती न्यायालयात दिली. गुंतवणूकदार मुकुंद चव्हाण व इतरांनी अॅड. धैर्यशील सुतार यांच्यामार्फत दाखल केलेल्या रिट याचिकेवर आज सुनावणी झाली. पोलिसांना कंपनीच्या मालमत्ता महाराष्ट्र गुंतवणूकदार हितसंबंध सरंक्षण कायद्यांतर्गत जप्त करावी, विपुल पाटील या मास्टर माईंडला अटक करावी, अशी मागणी याचिकेत केली आहे. पुढील सुनावणी तीन आठवड्यांसाठी तहकूब केल्याचे वकिलांनी सांगितले.
