मिरज प्रतिनिधी | खबऱ्या ऑनलाईन –मिरजेतील दोन तरूणांना गुन्हे प्रकटीकरण शाखेच्या पोलीसांनी संशयावरून पकडून झाडाझडती घेतली असता त्यांच्याकडे सव्वा लाखाचे चोरीचे १७ मोबाईल आढळून आले. गर्दीच्या ठिकाणी बेमालूमपणे मोबाईल लंपास करत असल्याची कबुली अटक केलेल्या दोघांनी दिली असल्याचे पोलीस निरीक्षक अरूण सुगावकर यांनी माध्यमांशी बोलताना सांगितले.
याबाबत मिळालेली माहिती अशी, गुन्हे प्रकटीकरण विभागाचे सहायक निरीक्षक विक्रम पाटील यांना संशयित हे मिरज बस स्थानक परिसरात येत असल्याची गुप्त माहिती मिळाली. त्यांनी सापळा लावून अहमदअली जमीर शिकलगार (वय २० रा.इदगाहनगर) आणि वसीम उर्फ आबु बादशाह सुभेदार (वय १९ रा.संजय गांधी नगर झोपडपट्टी) या दोघांना ताब्यात घेउन झडती घेतली असता त्यांच्याकडे चोरी केलेले १७ मोबाईल आढळून आले. या चोर्या त्यांनी मिरज शहर व इदगाहनगर परिसरात केल्याची कबुली दिली आहे.
