दुचाकीस्वार महिलेला अडवून थकीत दंडाची रक्कम कमी करण्यासाठी तिच्याकडून ५०० रुपयांची लाच घेणाऱ्या वाहतूक पोलीस कर्मचाऱ्याला वाहतूक शाखेचे उपायुक्त विजयकुमार मगर यांनी निलंबित केले.
पुणे : दुचाकीस्वार महिलेला अडवून थकीत दंडाची रक्कम कमी करण्यासाठी तिच्याकडून ५०० रुपयांची लाच घेणाऱ्या वाहतूक पोलीस कर्मचाऱ्याला वाहतूक शाखेचे उपायुक्त विजयकुमार मगर यांनी निलंबित केले. संग्राम लक्ष्मण पवार असे निलंबित केलेल्या पोलीस शिपायाचे नाव आहे.
पवार कोथरुड वाहतूक शाखेत नियुक्तीस आहेत. पवार कर्वे रस्त्यावरील नळस्टॉप चौकात वाहतूक नियमन करत होता. तेव्हा एक महिला दुचाकीवरुन निघाली होती. महिलेकडे थकीत दंडाची रक्कम मागितली. महिलेला दुचाकीची एनओसी नसल्याने दहा हजार रुपये दंड होईल, असे पवारने सांगितले. महिलेने दंड भरण्यास असमर्थता दर्शविल्यानंतर पवारने तिच्याकडे १ हजार रुपयांची मागणी केली.
महिलेने पैसे कमी करण्यास सांगितले. तेव्हा पवारने एका दुकानादाराकडे ऑनलाइन पद्धतीने ५०० रुपये जमा करण्यास सांगितले. महिला दुकानात गेली. तेव्हा दुकानदाराने तिला ५२० रुपये पाठविण्यास सांगितले. याबाबतची माहिती मिळाल्यानंतर पोलीस उपायुक्त मगर यांनी चौकशी केली. पवार याला निलंबित करण्याचे आदेश मगर यांनी दिले.
