चंदीगड : हरियाणातील नुहमध्ये विहिरीची पूजा करण्यासाठी गेलेल्या हिंदू महिलांवर मदशातून दगडफेक करण्यात आली आहे. गुरुवार, १६ नोव्हेंबर रोजी संध्याकाळी ही घटना घडली आहे. यामध्ये ८ महिला जखमी झाल्या आहेत. या घटनेमुळे सगळीकडे एकच खळबळ उडाली आहे.
गुरुवारी एका कुटुंबातील महिला जवळच्या शिवमंदिरात विहिरीची पूजा करण्यासाठी जात होत्या. यावेळी रात्री ८ वाजताच्या सुमारास मदरशातून त्यांच्यावर दगडफेक करण्यात आली. त्यानंतर घटनेची माहिती मिळताच पोलीस घटनास्थळी पोहोचले.
सीसीटीव्ही फुटेज तपासले असता तीन अल्पवयीन मुलांनी हे कृत्य केले असल्याची माहिती पुढे आली. दरम्यान, महिंलावर दगडफेक करणाऱ्या मदरशातील तीन अल्पवयीन मुलांपैकी दोघांची बालसुधारगृहात रवानगी करण्यात आली आहे. सीसीटीव्ही फुटेजच्या आधारे त्यांच्यावर ही कारवाई करण्यात आली आहे.
यातील ९ वर्षीय अल्पवयीन मुलाला बाल कल्याण समितीसमोर हजर करून जामीन मंजूर करण्यात आला. तर दोन १२ वर्षीय अल्पवयीन मुलांना बाल न्याय मंडळासमोर हजर करण्यात आले आणि त्यांची बालसुधारगृहात रवानगी करण्यात आली आहे.यात अन्य लोकांचा सहभाग अद्याप समोर आलेला नसून याप्रकरणी अधिक तपास सुरू आहे.
