सर्वोत्कृष्ट, सर्वप्रथम, बेधडक व विश्वसनीय :- गोपनीय खबऱ्या
आरोंदा पोलिस दूरक्षेत्रावरील कार्यरत दोन पोलिस हवालदारांची तातडीने बदली करा; अन्यथा आरोंदा पंचक्रोशीतील ग्रामस्थ ११ नोव्हेंबरपासून पोलिस मुख्यालयासमोर लाक्षणिक उपोषणाला बसतील, असा इशारा आरोंदा तंटामुक्ती अध्यक्ष रामचंद्र कोरगावकर यांनी जिल्हाधिकाऱ्यांना दिला.
कोरगावकर यांनी याबाबत पत्रक प्रसिद्धीस दिले आहे. त्यात असे म्हटले आहे, की आरोंदा पोलिस दूरक्षेत्रावरील दोन पोलिस हवालदार तीन वर्षांहून अधिक काळ एकाच ठिकाणी कार्यरत आहेत.
त्यांच्याकडून मनमानी कारभार सुरू असून, याबाबत आरोंदा ग्रामपंचायतीच्या ग्रामसभेतही ग्रामस्थांकडून आवाज उठविण्यात आला आहे. त्यानुसार त्यांच्या बदलीचा ठराव घेण्यात आला; मात्र याबाबत वरिष्ठ पातळीवरून काहीच हालचाली झाल्या नाहीत.
त्यामुळे तत्काळ बदली करण्यात यावी; अन्यथा ११ नोव्हेंबरपासून पोलिस मुख्यालयासमोर पंचक्रोशीतील ग्रामस्थांसोबत लाक्षणिक उपोषण छेडण्याचा निर्णय घेण्यात आला आहे. याबाबत जिल्हाधिकाऱ्यांना निवेदन दिले असून, त्यामध्ये माजी सरपंच उमा बुडे, विद्याधर नाईक यांच्या सह्या आहेत.
