कोल्हापूर (प्रतिनिधी) : गणेशोत्सव काळात डॉल्बी मालक आणि चालकांनी नियमांचे पालन करावे. मिरवणुकीत कायद्याने घालून दिलेल्या आवाजाचे उल्लंघन होणार नाही याची काळजी घ्यावी अन्यथा सक्त कारवाई करण्याचा इशारा पोलीस अधीक्षक महेंद्र पंडित यांनी दिला. गणेशोत्सवाच्या पार्श्वभूमीवर साऊंड सिस्टिम चालक-मालक आणि जिल्हा पोलीस प्रशासनाच्या बैठकीत ते बोलत होते.
गणेशोत्सव 2023 च्या पार्श्वभूमीवर जिल्हा पोलिसांकडून डॉल्बी साऊंड सिस्टिम मालक चालकांची अलंकार हॉल मध्ये बैठक घेण्यात आली. या बैठकीत गणेशोत्सव 2023 च्या अनुषंगाने चर्चा करण्यात आली. यावेळी साऊंड सिस्टीम असोसिएशनचे अध्यक्ष मुनीद मुल्ला यांच्यासह अनेक मालक-चालक उपस्थित होते.
यावेळी बोलताना पोलीस अधीक्षक महेंद्र पंडित यांनी डॉल्बी लावाल तर कारवाई होणार असल्याचा इशारा दिला. लेझर लाईटमुळे ज्या दुर्घटना घडतात त्याची जबाबदारी कोणाची? असं म्हणत डॉल्बीचा वापर करू नये असे आवाहन महेंद्र पंडित यांनी केले. कोल्हापुराला साजेसा गणेशोत्सव करून पोलिसांशी कटुता घेऊ नका आणि आम्हालाही कटुता घेण्यास भाग पाडू नका असा थेट इशाराच डॉल्बी चालकांना पोलीस अधीक्षकांनी दिला.
