जत (प्रतिनिधी ) : डफळापूर (ता. जत) येथील पोलिस चौकी लगत असणाऱ्या जिल्हा परिषद मराठी मुलींची शाळा नंबर दोनमध्ये अज्ञात व्यक्तीकडून गेल्या दीड महिन्यात तीन वेळा शाळेची तोडफोड करण्यात आली. यामध्ये आतापर्यंत सुमारे २५ हजार रुपयांचे नुकसान झाले आहे. अज्ञातांकडून दहशत माजवण्याचा प्रयत्न सुरू असून मुलींच्या सुरक्षेवर प्रश्नचिन्ह निर्माण झाले आहे.
जिल्हा परिषद अंतर्गत मॉडेल स्कूल करण्यासाठी डफळापूर येथील जिल्हा परिषद मराठी मुलींची शाळा नंबर दोनची निवड करण्यात आली असून तिथे आतापर्यंत ४० लाख रुपये खर्च करण्यात आले आहेत. पंचायत समितीकडील विषय तज्ज्ञ सुरेंद्र सरनाईक, केंद्रप्रमुख रतन जगताप, वरिष्ठ मुख्याध्यापक अरविंद बंडगर व शाळा व्यवस्थापन समितींच्या मार्गदर्शनाखाली विद्यार्थ्यांच्या गुणवत्तेत वाढ झाली आहे. मॉडर्न स्कूल अंतर्गत येथे शाळेचे सुशोभीकरण, नवीन प्रयोगशाळा, ग्रंथालय, खेळाचे साहित्य आदी सुधारणा करण्यात आलेली आहे. पटसंख्याही वाढलेली आहे. पहिली ते सातवी वर्गात दोनशे विद्यार्थी शिकत आहेत.
डफळापूर पोलिस चौकीसाठी एक सहायक फौजदार, हवालदार, एक कॉन्स्टेबल अशी नेमणूक आहे, परंतु या पोलिस चौकीमध्ये कोण फिरकत नसल्याचे दिसते. पोलिस चौकीला लागून असलेल्या मुलींच्या शाळेमध्ये दीड महिन्यात तीन वेळा तोडफोड झाली. तरीही पोलिस प्रशासनाने त्याची गांभीर्याने दखल घेतलेली नाही. त्यामुळे पालक वर्गातून तीव्र संताप व्यक्त होत आहे.
या शाळेत गेल्या दीड महिन्यात अज्ञात व्यक्तीकडून धुडगूस घालण्याचा प्रयत्न करण्यात आला. अज्ञातांनी दीड महिन्यात शाळेची दरवाजे, खिडक्यांची व शालेय साहित्यांची तोडफोड करण्याचा सपाटा लावला आहे, झाडांचेही नुकसान करण्यात आले आहे. या घटनेबाबत शाळेचे वरिष्ठ मुख्याध्यापक अरविंद बंडगर यांनी जत पोलिसात फिर्याद नोंद केली आहे.
