शुक्रवारी महापालिकेच्या महासभेमध्ये प्रचंड गदारोळ पाहावयास मिळाला. यावेळी वादावादी झाली. नगरसेवकांमध्ये तुफान फटकेबाजी झाली. आरोप प्रत्यारोपांच्या फैरी वाढत गेल्या. यावेळेस विकास कामावरून सुरू असलेला वाद अरेरावीपर्यंत गेला. नगरसेवक योगेंद्र थोरात यांनी “मी मागासवर्गीय असल्याने मला टार्गेट केलं जात आहे” असा आरोप राष्ट्रवादीच्याच नगरसेवकावरती केला. तर संगीता हारगे यांनी आम्हाला ॲट्रॉसिटीचे खोटे गुन्हे दाखल करतो म्हणून ब्लॅकमेल केल जात आहे. असा थेट आरोप नगरसेवक योगेंद्र थोरात यांच्यावरती केला.
तर याच महासभेमध्ये ठेकेदाराच्या नावावर एक नगरसेवक दलाली करत आहे. कर्मचाऱ्यांच्या पगारातून पैसे वसूल करत असल्याचा आरोप राष्ट्रवादीचे गटनेते मैनुद्दीन बागवान यांनी केला. यावर हा नगरसेवक कोण..? याची विचारणा इतर सदस्यांनी केली. कंत्राटी कर्मचाऱ्यांनी नगरसेवक नायकवडी असे नाव घेतले. मात्र काँग्रेसचे गटनेते संजय मेंढे यांनी नगरसेविका वहिदा नाईकवडी या सभागृहात आहेत. त्यामुळे संबंधित नगरसेवकाचे पूर्ण नाव काय..? असा सवाल केला. यावर बागवान यांनी नगरसेविका नसून नगरसेवक असा उल्लेख कर्मचाऱ्यांनी केल्याचे सभागृहाच्या निदर्शनास आणून दिले. यावेळेस संबंधित नगरसेवकाकडून महिला कर्मचाऱ्यांना धमकी मिळत असल्याचाही आरोप कंत्राटी तत्त्वावरील कर्मचाऱ्यांनी केला. प्रसंगी महासभेसमोर आपल्या व्यथा मांडत असताना महिला कर्मचाऱ्यांना अश्रू अनावर झाले.
