मुंबई : राष्ट्रपिता महात्मा गांधी यांच्याबद्दल आक्षेपार्ह वक्त्यव्य करून संपूर्ण राज्यात खळबळ उडवून देणाऱ्या संभाजी भिडे यांच्यावर कारवाईची मागणी करत विरोधकांनी विधीमंडळात गदारोळ घातला होता. त्यानंतर आता संभाजी भिडे यांच्याविरुद्ध कायदेशीर कारवाईच्या हालचाली सुरू झाल्या आहेत. संभाजी भिडे यांच्या वक्तव्याच्या ऑडिओ क्लिप फॉरेन्सिक तपासणीसाठी पाठविण्यात येणार आहेत. यासाठी राजापेठ पोलिसांनी संभाजी भिडेंना आठ दिवसात अमरावती पोलिसाकडे हजर राहण्याचे आदेश दिले आहेत .
याबाबत अधिक माहिती अशी कि , शिवप्रतिष्ठान हिंदुस्तानचे संस्थापक मनोहर कुलकर्णी ऊर्फ संभाजी भिडे यांच्या महापुरुषांबद्दल केलेल्या वादग्रस्त विधानामुळे सध्या राज्यातवातावरण तापलं आहे. भिडे यांना दाखल गुन्ह्याच्या अनुषंगाने त्यांचे म्हणणे मांडण्याची सूचना करण्यात आली आहे. त्यामुळे आठ दिवसात संभाजी भिडे अमरावती पोलिसांकडे हजर राहतात का? याकडे लक्ष लागलं आहे. याचबरोबर संभाजी भिडे यांच्या विरोधात राज्यात ज्या-ज्या ठिकाणी गुन्हे दाखल झाले आहेत. ते सर्व गुन्हे अमरावतीत वर्ग करण्यात आले असल्याची माहिती अमरावती जिल्ह्याचे पोलीस आयुक्त नवीनचंद्र रेड्डी यांनी दिली आहे.
दरम्यान शिवप्रतिष्ठानचे संस्थापक संभाजी भिडे यांनी २७ जुलै रोजी सायंकाळी एका जाहीर सभेत महापुरुषांबाबत वादग्रस्त विधान करून विविध समाजघटकांमध्ये तेढ निर्माण करण्याचा प्रयत्न केला. त्याचबरोबर महापुरुषांची बदनामी केली. या तक्रारीवरून राजापेठ पोलिसांनी संभाजी भिडे निशांतसिंह जोध, अविनाश मरकल्ले व इतरांविरुद्ध गुन्हा दाखल केला होता. त्या गुन्ह्याच्या अनुषंगाने संभाजी भिडे यांना आज नोटीस जारी करण्यात आली आहे असून ती त्यांच्यापर्यंत पोहोचली आहे.
