पन्हाळा, प्रतिनिधी : वारणानगर येथील वारणा दूध संघाच्या जळावू लाकडाच्या डेपोत भरून आलेल्या ट्रकमधील लाकूड उतरत असताना ६ फूट ८ इंच लांबीचा अजगर कर्मचाऱ्यांना आढळून आला. कर्मचाऱ्यांनी त्याला सर्पमित्रांच्या सहकार्याने पकडून वनविभागाच्या ताब्यात दिले. त्यांनी त्या अजगराला जंगलात सोडले.
अमृतनगर येथील वारणा दूध संघाच्या कार्यस्थळावर जळावू लाकडाचा डेपो आहे. या डेपोवर जळावू लाकूड भरून ट्रक येत असतात. सकाळी कर्मचारी ट्रकमधील लाकूड उतरवत असताना सकाळी अचानक ट्रकमधील लाकडामध्ये अजगर असल्याचे तेथील कर्मचाऱ्यांना निदर्शनास आले. याची माहिती मिळताच सर्पमित्र माच्छिंद्र गायकवाड, ऋषीराज सिद, रोहीत रेडेकर, राहूल इंगळे, धीरज ईरकर, सौरभ माने, राहूल निंबाळकर, विवेक सिद, आनंदा काळे, दिगंबर कुंभार यांनी त्याला पकडून वनविभागाच्या ताब्यात दिले. या घटनेची माहीती मिळताच वनक्षेत्रपाल रमेश कांबळे, वनपाल साताप्पा जाधव, वनरक्षक रेणुका नाईक, वनसेवक पुंडलिक खाडे यांनी तत्काळ डेपोत येऊन अजगराला पकडले आणि जंगलात सोडले.
