गांधीनगर/प्रतिनिधी : पीडित महिलेचा विनयभंग होत असताना तिने स्वतःची सुटका करून घेण्यासाठी मारलेल्या दगडाने निखिल सुनील कांबळे हा जखमी झाला असून परस्पर विरोधी तक्रारी गांधीनगर पोलीस ठाण्यात दाखल केल्या आहेत. पण गांधीनगर पोलिसांनी पीडित महिलेवरच कडक कलम लावल्याने नागरिकांमधून संताप व्यक्त करण्यात येत आहे.
याबाबत अधिक माहिती अशी की, करवीर तालुक्यातील गांधीनगर रेल्वे स्टेशन नजीक गडमुडशिंगी गावच्या हद्दीतील येडेकर मळ्यात राहणारी पीडित महिला गांधीनगर मध्ये धुनी भांडीची काम करते. शनिवार दिनांक 22 रोजी दुपारी पावणेतीन वाजता ही पीडित महिला रूप संगम साडी दुकानाजवळ असणाऱ्या बोळातून घरी जात होती. याचवेळी निखिल सुनील कांबळे हा पाठीमागून आवाज देत जवळ येऊन पीडीतेचा विनयभंग केला. त्याच्या तावडीतून सुटण्यासाठी पिढीतेने दगड मारल्याने तो दगड निखिल कांबळे यांच्या डोक्यात लागला. यावेळी मोठ्या प्रमाणात आरडा ओरडा झाल्याने नागरिक गोळा झाले. यावेळी निखिल कांबळे हा पळून गेला. तर काही वेळाने निखिल कांबळे हा हातात शस्त्र घेऊन रेडेकर मळ्याकडे धावत असल्याचे अनेकांनी पाहिले. याबाबत पीडित महिलेने निखिल कांबळे यांच्यावर गांधीनगर पोलीस ठाण्यात तक्रार दिली आहे. तर निखिल कांबळे यांनेही पीडित महिलेसह त्याच्या पतीच्या विरोधात गांधीनगर पोलीस ठाण्यात दगडाने मारहाण केल्याची तक्रार दाखल केली आहे.
दोन्ही कडून तक्रारी दाखल झाल्यांनतर गांधीनगर पोलिसांनी दोघांच्या वर ही तक्रारी दाखल करून घेतली असून स्वतःला वाचवण्यासाठी पीडित महिलेने केलेल्या दगडफेकी बाबत गांधीनगर पोलिसांनी पिडीतेवर ज्यादा कलम लावून अन्याय केल्याचे नागरिकांमधून बोलले जात आहे.
