सांगली जिल्ह्यात क्राईम रेट खूपच वाढला असल्याचे स्पष्ट झाले आहे. चालू आठवड्यामध्ये नगरसेवकांनी फायरिंग केल्याची घटना, रिलायन्स ज्वेलर्सवरील १४ कोटींचा धाडसी दरोडा, याचबरोबर आता इस्लामपूरमध्ये गॅंगवॉर मधून सराईत गुन्हेगाराचा खून.. जिल्ह्यातील गुन्हेगारी नियंत्रित करण्यासाठी पोलिसांना अपयश आल्याचे बोलले जात असून नागरिकांच्या संतप्त प्रतिक्रिया येत आहेत.
इस्लामपूर येथील बहे नाक्यावरील मल्हारबार समोर एका सराईत गुन्हेगाराचा खून करण्यात आला. “आमच्या गँगमध्ये का येत नाहीस” असे म्हणत रेकॉर्डवरील गुन्हेगाराचा निर्घृण खून करण्यात आला. त्याच्या डोक्यात चोपरने वार करून तसेच दगड, विटांनी मारहाण करून त्याचा खून करण्यात आला.
मंगळवारी दहाच्या सुमारास नवीन बहे नाका येथील मल्हार बारसमोर ही घटना घडली. पोलिसांच्या रेकॉर्डवरील चार गुंडांनी हे कृत्य केल्याचे प्राथमिक तपासात निष्पन्न झाल्याचे समजते आहे . याप्रकरणी चौघांविरोधात इस्लामपूर पोलिस ठाण्यात खुनाचा गुन्हा दाखल करण्यात आला आहे. प्रकाश महादेव पुजारी (रा.एमआयडीसी, इस्लामपूर, मूळ रा. सातबुलता, इंडी, जि. विजापूर) असे मृताचे नाव आहे. याप्रकरणी गजराज पाटील, सागर ऊर्फ चकल्या म्हस्के, अकीब पटेल,व एक अनोळखी अशी गुन्हा दाखल झालेल्यांची नावे आहेत.
याप्रकरणी रोहन रविंद्र इच्छूर (वय १७, रा. एमआयडीसी, इस्लामपूर, मूळ रा. सातबुलता, इंडी, जि. विजापूर) याने फिर्याद दिली आहे.
मृत पुजारीसह सर्व संशयित पोलिसांच्या रेकॉर्डवरील गुन्हेगार आहेत. संशयित गजराज पाटील याची गुन्हेगारांची टोळी आहे. त्याद्वारे तो गुन्हेगारी व दहशत पसरवत फिरत असतो. मृत प्रकाश पुजारीही गुन्हेगार होता. प्रकाश हा गजराजच्या गँगमध्ये सामील होत नसल्याने त्याच्यासह त्याच्या टोळीला राग होता. मंगळवारी रात्री दहाच्या सुमारास नवीन बहे नाका येथील बारबाहेर प्रकाश थांबला होता. त्यावेळी संशयित त्याठिकाणी आले. त्यांनी त्याला “आमच्या गँगमध्ये का सामील होत नाहीस” म्हणत त्याच्यावर हल्ला केला.
गजराजने चोपरने त्याच्या डोक्यावर वर्मी घाव घातले. त्यानंतर अन्य संशयितांनी लाथाबुक्यांनी, दगड, विटांनी त्याला मारहाण करून त्याचा खून केल्याचे फिर्यादीत म्हटले आहे. घटनास्थळी वरिष्ठ अधिकाऱ्यांसोबत गुन्हे अन्वेषण शाखा इस्लामपूरच्या पथकाने भेट दिली.पुढील तपास इस्लामपूर पोलीस करीत आहेत.
