नात्यातील अल्पवयीन मुलीवर अत्याचार केल्याप्रकरणी आरोपी मारूती शंकर झोरे (वय ५०, रा. मिरज) याला ३० वर्षे सक्तमजुरी व दहा हजार रूपये दंडाची शिक्षा सुनावण्यात आली. जादा सह जिल्हा व सत्र न्यायाधीश डी. एस. हातरोटे यांनी हा निकाल दिला. सरकारतर्फे अतिरिक्त जिल्हा सरकारी वकील आरती देशपांडे- साटविलकर यांनी खटला चालवला.
खटल्याची हकीकत अशी,ऑगस्ट २०२० मध्ये पिडीत मुलीला ११ वीच्या प्रवेशासाठी शाळेमध्ये घेऊन जात आहे असे सांगून आरोपी झोरे याने तिला वैद्यकीय तपासणी करण्यासाठी व सोनोग्राफी करण्यासाठी मिरज येथे नेले. तपासणी केल्यानंतर मुलगी तीन महिन्याची गर्भवती असल्याचे डॉक्टरांनी सांगितले.
डॉक्टरांना मुलीच्या वयाबाबत शंका आली. आरोपीकडे वयाबाबत चौकशी केली त्याने १८ पेक्षा जास्त आहे असे सांगितले. डॉक्टरांना संशय आल्यामुळे मिरज ग्रामीण पोलिसांना कळवले. पोलिसांनी चौकशी केली असता आरोपीने मुलीचे चुकीचे नाव डॉक्टरांना सांगितल्याचे निष्पन्न झाले.
पोलिस ठाण्यात चौकशी केल्यानंतर मुलीने मित्राविरुद्ध बलात्काराचा गुन्हा दाखल केला. मिरज सिव्हील हॉस्पीटलमधील डॉक्टरांनी दिलेला अहवाल व मुलीची तक्रार यामध्ये तफावत आढळून आली. तपासी अधिकारी श्रीमती प्रियांका बाबर यांनी तिच्याकडे खोलवर चौकशी केली. तेव्हा तिने आरोपी मारूती झोरे याने अत्याचार केल्याचे तसेच त्यानेच डॉक्टरांना चुकीचे नाव सांगण्यास सांगितले असल्याचे स्पष्ट केले. आरोपीने दिलेल्या धमकीमुळे तसेच
कुटुंबाचा विचार करून तिने ही घटना कुणालाही सांगितली नव्हती. तिच्या जबाबावरुन आरोपी मारूती झोरेविरुद्ध गुन्हा दाखल करण्यात आला.
तपास करून न्यायालयात पोलिसांनी दोषारोपपत्र दाखल केले. सरकारपक्षातर्फे एकूण १३ साक्षीदार तपासण्यात आले. पिडीत मुलीचा जबाब व आईचा जबाब चालू असतानाच आरोपी त्यांना माझी केस मागे घ्या, माझ्याकडून चूक झाली अशी विनवणी करत होता. परंतु, पिडीत मुलीची आई आपल्या मुलीला न्याय देण्यासाठी खंबीरपणे मागे उभी राहिली. तसेच वैद्यकीय अधिकारी शिक्षा यांची साक्ष, न्यायवैज्ञानिक प्रयोगशाळेचा डीएनए अहवाल अतिशय महत्त्वपूर्ण ठरले. त्यानुसार आरोपीला ३० वर्षे सक्तमजुरीची सुनावली. न्यायालयीन कामकाजात पोलिस अंमलदार शामकुमार साळुंखे, पैरवी कक्षातील श्रीमती रेखा खोत, सुनीता आवळे, वंदना मिसाळ आदींचे सहकार्य लाभले.
