सांगलीतील रिलायन्स ज्वेलर्स मधील धाडसी दरोड्यातील चार चाकी गाडी मिरज तालुक्यातील भोसे येथे एका शेतात सापडली. सदरची गाडी ही पोलिसांनी जप्त केलीय. सफारी एम एच 04- ET 88 94 नंबरची गाडी असून भोसे येथील संजय चव्हाण यांच्या शेतात असणाऱ्या रस्त्यावर गाडी सोडून चोरट्यानी पळ काढला. सदर गाडीमध्ये चोरट्यांची कपडे, बॅग व अन्य साहित्य पोलिसांना मिळाले. या ठिकाणी गाडीत दोन रिवाल्वर पोलिसांना सापडले आहेत. गाडी सोडून चोरटे पसार झाले आहेत. पोलिसांनी चोरट्यांचा शोध सुरू केला आहे. घटनास्थळी मिरज उपविभागीय पोलीस अधिकारी प्रणिल गिल्डा, मिरज ग्रामीणचे पोलीस निरीक्षक नारायण देशमुख यांच्यासह मोठा पोलीस फौजफाटा दाखला झाला आहे. तसेच या ठिकाणी श्वान पथक पाचारण करण्यात आले आहे.
रविवारी भर दुपारी सांगली शहरातील सांगली मिरज रोडवर रिलायन्स या सोने चांदीच्या शोरूमवर सशस्त्र दरोडा टाकण्यात आला होता. शोरूम मधील सोन्या चांदीचे दागिने लुटून नेल्याची घटना घडली आहे .फायरिंग करून धाडसी दरोडा घातल्यामुळे खळबळ उडाली आहे. गाडीतील साहित्यामुळे पोलिसांना दरोडेखोरांपर्यंत पोहोचण्यासाठी मार्ग मिळत आहे.
