सांगली : खबऱ्या प्रतिनिधी / जिल्हा पोलीस दलाचे नाव अलीकडच्या काही वर्षात पुन्हा अभिमानाने “मान” उंचावत असतानाच, काही ढोंगबाज अधिकाऱ्यांमुळे जनमाणसांत मान खाली घालायला लागेल अशी परिस्थिती पुन्हा उद्भवू लागली आहे.
जिल्हा पोलीस दलातील किडक्या वृत्तीच्या “धना”साठी आपली “पाटीलकी” पणाला लावणाऱ्या अधिकाऱ्याला संपूर्ण जिल्हा पोलीस दलाचा प्रमुख “मी”च आहे, अशी दिवसा स्वप्ने पडू लागल्याने, पोलीस ठाण्याचे प्रमुख सुध्दा त्याला “अभि”के “अभि” म्हणत जातीयतेची साथ देत आहेत.
पोलीस म्हणजे आईने त्यागलेला कर्ण. असे काहींच्या बोलण्यातून आपण ऐकले असेल. सर्वच जाती धर्मीयांसाठी आधार वाटतो तो हक्काचा पोलीस. जातींमध्ये भेदभाव न मानता साऱ्यांच्याच सण उत्सवाला अगदी रात्रंदिवस संरक्षणार्थ उभा असतो आपला पोलीस बांधव. परंतु पोलीस ठाण्यातील प्रामाणिक कर्मचाऱ्यांसोबत “धना”साठी घुसमट होत असलेल्या अधिकाऱ्यांचे वागणे मात्र खूपच विचित्र सुरू असल्याची कुजबूज आहे.
जिल्ह्यातील एका पोलीस ठाण्यात तर चक्क “पाटलांची” जोरदार हवा असल्याचे चित्र पाहायला मिळतेय. तर त्याच पोलीस ठाण्यात चार जण एकत्र येत “शंकर” शाळा करीत असल्याचा अनुभव अर्धा डझन कर्मचाऱ्यांना आलाय. राज्याच्या राजकारणात देशमुखी, पाटीलकी, पवार पॅटर्न करणाऱ्या नेत्यांना महाराष्ट्राने अनुभवले आहे. आता यापाठोपाठ जातीयतेचा मुद्दा उपस्थित करत खाकीला बदनाम करणाऱ्या “अभि”नेत्यांचा नंबर अग्रस्थानी असल्याची जोरदार चर्चा वाऱ्यासारखी पसरल्याने जिल्हा पोलीस दलात खळबळ उडाली आहे.
