कडेगाव : तलवारीने जीवे ठार मारण्याची धमकी देत अल्पवयीन पीडितेला जबरदस्तीने ऊस पिकाच्या शेतात नेऊन बलात्कार केल्याची धक्कादायक घटना तालुक्यात उघडकीस आली आहे.
याप्रकरणी संशयित आरोपी अजित विजय जाधव (वय 32, रा. तडसर ) याच्याविरोधात चिंचणी वांगी पोलीस ठाण्यात पोक्सो कायद्यांतर्गत गुन्हा दाखल झाला आहे. दरम्यान या घटनेचा कडेगाव तालुक्यातून तीव्र निषेध व्यक्त केला जात आहे.
याबाबत कडेगाव पोलिसांनी दिलेली अधिक माहिती अशी की , पीडित ही अल्पवयीन असल्याचे माहित असताना देखील संशयित आरोपीने 2 सप्टेंबर 2022 ते 27 जाने 2023 पर्यंत वेळोवेळी तडसर गावाच्या हद्दीत अत्याचार केला. 2 सप्टेंबर 2022 रोजी पीडितेला तिच्या घराच्या पाठीमागे असलेल्या ज्वारीच्या शेतात नेऊन व तलवारीने जीवे ठार मारण्याची धमकी देऊन पहिल्यांदा अत्याचार केला. त्यानंतर जबरदस्तीने तिच्यासोबत अनेकवेळा अत्याचार केला.
त्यानंतर पीडिता गर्भवती राहिल्याची माहिती मिळताच 2 फेब्रुवारी संशयित आरोपीने गर्भपाताचे औषध पाण्यात मिसळून जबरदस्तीने पाजले. व इतर औषधे जबरदस्तीने खायला लावली. त्यानंतर 4 फेब्रुवारी पहाटे 3 वाजता पीडितेचा गर्भपात झाला. याप्रकरणी पीडितेने चिंचणी वांगी पोलीस ठाण्यात फिर्याद दिली आहे. अधिक तपास सहाय्यक पोलीस निरीक्षक संदीप साळुंखे करीत आहेत.
