सांगली, : चॅप्टर केसमध्ये पर्सनल बॉण्डवर सोडण्यासाठी व चॅप्टर केस निकाली काढण्यासाठी तीन हजार रुपयाची लाच स्विकारताना आटपाडी तहसिलमधील महसूल सहायक महेबुब नबिलाल बागवान (वय ४२ वर्ष, रा. दत्तनगर, मज्जीद समोर आटपाडी, मुळ रा. मु.पो. लोहारा बुद्रुक इंदिरानगर, जि. उस्मानाबाद) याला रंगेहात पकडले. लाचलुचपत प्रतिबंधक विभागाने ही कारवाई केली.
अधिक माहिती अशी, तक्रारदार यांच्यावर दाखल असलेल्या गुन्ह्यांच्या अनुषंगाने चॅप्टर केसची सुनावणी निवासी नायब तहसिलदार आटपाडी यांच्या समक्ष सुरु आहे. सुनावणीमध्ये वरीष्ठांना सांगुन चॅप्टर केसमध्ये पर्सनल बॉण्डवर सोडण्यासाठी व चॅप्टर केस निकाली काढण्यासाठी चॅप्टर केस टेबलचे काम पाहणारा महसुल सहायक बागवान याने पाच हजार रुपये लाचेची मागणी केली. याबाबत तक्रारदार यांनी लाचलुचपत प्रतिबंधक विभागाकडे तक्रार अर्ज दिला.
तक्रारीनुसार पडताळणी केली असता त्यामध्ये बागवान याने पाच हजार रुपये लाचेची मागणी करुन तडजोडीअंती तीन हजार रुपये लाचेची मागणी केल्याचे स्पष्ट झाले. सदरची लाच दोन दिवसात आणुन देण्यास सांगितले होते.
आज बागवान यांच्याविरुद्ध आटपाडी तहसिलदार कार्यालय आवारात सापळा लावला असताना बागवान याला तीन हजार रुपये लाच स्विकारल्यावर रंगेहात पकडण्यात आले. बागवान याच्याविरुध्द आटपाडी पोलीस ठाण्यात लाचलुचपत प्रतिबंधक अधिनियमाखाली गुन्हा दाखल करण्यात आला. उपाधीक्षक संदीप पाटील, निरीक्षक दत्तात्रय पुजारी, अंमलदार धनंजय खाडे, प्रितम चौगुले, अजित पाटील, सीमा माने, सलीम मकानदार, राधीका माने, ऋषीकेश बडणीकर, अतुल मोरे, सुदर्शन पाटील, अंनिस वंटमुरे यांनी कारवाई केली.
