पलूस:- अवैध गौण खनिज वाहतूक प्रकरणी तलाठी / मंडळ अधिकाऱ्यांनी पकडून कारवाईसाठी तहसील कार्यालयात आणलेल्या वाहनांवर प्रत्यक्षात कारवाई करताना शासनाने दिलेल्या निर्देशाना चक्क फाट्यावर मारण्यात आल्याचा धक्कादायक प्रकार पलूस तहसील कार्यालयात उघडकीस आला असून कारवाईत बगल दिल्याने शासनाचा लाखो रुपयांचा महसूल बुडाला असल्याचे स्पष्ट होत आहे. याबाबतची सर्व कागदपत्रे तपासली असता प्रकरणे बाहेर येतील.
पलूस तालुक्यातून अवैध गौण खनिजाची वाहतूक करीत असताना काही वाहने तलाठी तसेच मंडळ अधिकाऱ्यांनी पकडली. अवैध गौण खनिज वाहतुकीचा कोणताही परवाना अथवा पास नसल्याने सदर वाहने पंचनामा व संबंधितांचे जबाब नोंदवून तहसील कार्यालयात जमा करण्यात आली. मात्र पुढील कारवाई शासकीय निर्देशानुसार दंड वसूल होणे अपेक्षित असताना अवैध गौण खनिजाची वाहतूक करणाऱ्यांच्या सोयीनुसार दंड आकारणी करून वाहने सोडण्यात आली असल्याचे कागदपत्रांवरून दिसत आहे.
सदर कारवाई मुळे मात्र शासनाचा लाखो रुपये महसूल बुडाला असल्याचा संशय व्यक्त केला जात असून सदर प्रकरणांची चौकशी होणे गरजेचं असून दोषींवर कारवाई व्हावी अशी मागणी होत आहे.
