मिरज खबऱ्या प्रतिनिधी / शहरातील छत्रपती शिवाजी महाराज रस्त्याचे काम अत्यंत संथ गतीने सुरू असून रस्त्यावरील अतिक्रमणे व विजेचे खांब स्थलांतरित करण्याबाबत कोणत्याच हालचाली दिसत नाहीत. त्यामुळे रस्त्याचे काम रखडण्याची दाट शक्यता आहे. म्हणून या रस्ता कामातील तांत्रिक अडचणी दूर करून रस्ता जलदगतीने होण्यासाठी मिरज शहर सुधार समितीने थेट केंद्रिय रस्ते व वाहतूक मंत्री नितीन गडकरी यांना सांगली येथे भेटून साकडे घातले.
शनिवारी केंद्रिय रस्ते व वाहतूक मंत्री नितीन गडकरी हे सांगली जिल्ह्याच्या दौऱ्यावर आले असता, भाजपचे जेष्ठ नेते मकरंद देशपांडे यांच्या समवेत मिरज शहर सुधार समिती अध्यक्ष शंकर परदेशी, जहीर मुजावर, रामलिंग गुगरी, असिफ निपाणीकर, मन्सूर शेख आदी सदस्यांनी त्यांची भेट घेतली. त्यांना दिलेल्या निवेदनात म्हटले आहे, छत्रपती शिवाजी महाराज रस्त्याची अत्यंत दयनीय अवस्था झाली आहे. सुमारे 11 किमी रस्त्यासाठी केंंद्रिय रस्ते व वाहतूक मंत्री नितीन गडकरी यांनी सुमारे 27 कोटींचा निधी मंजूर केला आहे. 24 कोटींची निविदा मंजूर होऊन प्रत्यक्ष कामाला सुरूवात झाली आहे.
रस्ता रूंदीकरण, अतिक्रमण हटविणे आणि विद्युत खांब स्थलांतरित करणे आदी कामांबाबत राष्ट्रीय महामार्ग प्राधिकरण, महापालिका आणि महावितरण कंपनी एकमेकांकडे बोट दाखवून जबाबदारी झटकत आहेत. त्यामुळे अत्यंत संथगतीने सुरू असलेले काम रखडण्याची दाट शक्यता आहे. म्हणून, राष्ट्रीय महामार्ग प्राधिकरणाने तयार केलेल्या अंदाजपत्रकाप्रमाणे म्हणजे २२किलोमीटर रस्ता होण्यासाठी कामात येणाऱ्या तांत्रिक अडचणी दूर करण्याची मागणी सुधार समितीने केंद्रिय मंत्री गडकरी यांच्याकडे केली आहे.
