खबऱ्या प्रतिनिधी : जिवंत नाग पकडून त्याची पूजा केल्या प्रकरणी सलगरेमध्ये एका विरुद्ध तर तीन नाग पकडून एका खोलीत ठेवल्याप्रकरणी शिराळ्यात दोघांविरुद्ध वनविभागाने कारवाई केली.
तिघांविरुद्ध गुन्हा दाखल करण्यात आला आहे.
गुन्हा दाखल करण्यात आलेल्यांमध्ये बसाप्पा किसान माळी (रा. सलगरे, ता. मिरज), विशाल अशोक पवार (वय 29, रा. कुरळप, ता. शिराळा) आणि एक अल्पवयीन तरुणाचा समावेश आहे.
याबाबत वनविभागाने दिलेली माहिती अशी की, सलगरे येथे जिवंत नागाची पूजा केल्याचा व्हिडीओ व्हायरल झाला होता. याची पडताळणी करण्यासाठी वनविभागाचे पथक सलगरे येथे गेले असता बसाप्पा माळी याने दि. 31 जुलै रोजी सलगरे येथील महादेव मंदिराशेजारी असणार्‍या विहिरीजवळील नाग पकडून तो रात्रभर मंदिरात ठेवला होता. त्यानंतर सोमवारी सकाळी त्याला बाहेर काढून त्याचे प्रदर्शन करून, खेळवून त्याची पूजा केली होती. याप्रकरणी त्याच्या विरुद्ध गुन्हा दाखल करण्यात आला आहे.
विशाल पवार आणि त्याचा अल्पवयीन साथीदार या दोघांनी तीन जिवंत नाग पकडून शिराळ्यातील परीट मळा येथे असणार्‍या एका शेतातील बंद असलेल्या घरात लपवून ठेवले होते. याबाबत वनविभागाला माहिती मिळाल्यानंतर सांगली उपवनसंरक्षक नीता कट्टे, सहायक वनसंरक्षक डॉ. अजित साजणे, वनपरिक्षेत्र अधिकारी पल्लवी चव्हाण, इस्लामपूर वनपाल प्रकाश पाटील यांच्या पथकाने छापा टाकला. यावेळी पवार व अल्पवयीन मुलाला अटक करून संबंधित तीन नाग वनविभागाने ताब्यात घेतले आहेत.
