विटा; खबऱ्या प्रतिनिधी: विटा पोलिसांच्या कारवाईत आज मंगळवारी दोन सराईत मोटारसायकल चोरांना अटक करून त्यांच्याकडून तब्बल 1 लाख 85 हजारांचा मुद्देमाल जप्त केला.
तसेच आटपाडी पोलिस ठाण्यातील दोन आणि जेजुरी व विटा पोलिस ठाण्याकडील प्रत्येकी एक गुन्हा उघडकीस आणला आहे.
याबाबत विट्याचे पोलिस निरीक्षक संतोष डोके यांनी दिलेली माहिती अशी की, यावर्षी 22 मे रोजी दुपारी बारा ते एकच्या दरम्यान समाधान शामराव कारंडे (रा. करांडेवाडी फाटा, ता. सांगोला, जि. सोलापूर) यांची हिरोहोंडा स्प्लेंडर मोटारसायकल (क्र. एम एच 45 ए.के.3015) ही शुक्राचार्य देवस्थान जवळील ताडाचीवाडी (ता. खानापूर) गावच्या हद्दीतील पार्किंगमधून चोरीला गेली होती. याबाबत विटा पोलिस ठाण्यामध्ये 23 मेरोजी गुन्हा दाखल झाला होता. या गुन्ह्याचा तपास पोलिस उपनिरीक्षक जालिंदर जाधव यांच्या मार्गदर्शनाखाली सहाय्यक पोलिस निरीक्षक तुकाराम नागराळे हे करीत होते.
दरम्यान, 24 जुलैरोजी खानापूर पोलिस चौकीचे पोलिस संतोष घाडगे आणि महेश खिलारी हे गस्त घालत होते. त्यावेळी त्यांना या गुन्ह्यातील संशयित आरोपी किरण शिवाजी ऐवळे (वय 22, रा. ताडाचीवाडी, ता. खानापूर) आणि प्रशांत अरुण पवार (वय 23, रा. ताडाचीवाडी, ता. खानापूर, जि. सांगली) हे दोघे संशयास्पदरित्या सापडले. त्यांना ताब्यात घेऊन सखोल चौकशी केली असता त्यांच्याकडे ताडाचीवाडी येथील चोरीला गेलेली मोटरसायकल मिळून आली. तसेच या संशयितांना न्यायालयाकडून पोलिस कोठडी मिळवून त्यांच्याकडे तपास केला असता त्यांनी खरसुंडी, आवळाई यात्रा, जेजुरी येथून आणखी तीन मोटार सायकल चोरल्याची कबुली दिली.
त्यांच्याकडून या मोटरसायकली जप्त करण्यात आल्या आहेत. या दोघांवर मिळून विटा, जेजुरी आणि आटपाडी येथील पोलिस ठाण्यांमध्ये एकूण चार गुन्हे दाखल आहेत. या चार गुन्ह्यातील एकूण 1 लाख 85 हजार रुपये किमतीच्या 4 मोटरसायकली असा मुद्देमाल जप्त करण्यात आला आहे.
