इस्लामपूर,बापूसाहेब कांबळे/ खबऱ्या प्रतिनिधी : किरकोळ कारणातून घरात घुसून युवकाला शिवीगाळ, दमदाटी करून मारहाण केल्याप्रकरणी न्यायाधीश हेमंत पी. पाचोली यांनी तिघांना ३ वर्षे सश्रम कारावासाची शिक्षा सुनावली. प्रत्येकी ३ हजार रुपये दंड भरण्याचा आदेश दिला. मारहाणीचा हा प्रकार तीन वर्षापूर्वी नेर्ले येथे घडला होता. विजय संपत शिद (वय ३८), सचिन सर्जेराव शिद (वय ३०), राजेंद्र संपत शिद (वय ३०, सर्व रा. नेर्ले धनगर गल्ली, ता. वाळवा, सध्या रा. बोरीवली ईस्ट मुंबई) अशी शिक्षा झालेल्या आरोपींची नावे आहेत. ४ मे २०१९ रोजी फिर्यादी संजय अंकुश शिद हे घरी झोपले होते. त्यावेळी विजय, सचिन, राजेंद्र हे काठ्या घेऊन संजय यांच्या घरी गेले. घराचा दरवाजा उघडून विजय याने संजय यास तू माझा फोन का उचलला नाहीस, असे म्हणाला.
तिघांनी संजय याला शिवीगाळ, दमदाटी करून काठ्यांनी मारहाण केली. संजय यांनी कासेगाव पोलिस ठाण्यात फिर्याद दिली. पोलिसांनी तिघांविरोधात गुन्हा दाखल करून इस्लामपूर न्यायालयात दोषारोपपत्र दाखल केले होते.
