सांगली ; खबऱ्या प्रतिनिधी : महानगरपालिकेकडील विविध कामांच्या 350 फाईल गतिमान झाल्या आहेत. मुख्य लेखाधिकारी कार्यालयातून या फाईल मुख्य लेखापरीक्षक कार्यालयाकडे मंजुरीसाठी सादर झाल्या आहेत.
गेल्या पंधरा दिवसांत बांधकाम विभागाकडून तसेच प्रभाग समित्यांकडून मोठ्या प्रमाणात कामांच्या फाईली मुख्य लेखाधिकारी कार्यालयाकडे आल्या आहेत. एकदम जादा फाईल आल्याने, ऑनलाईन सिस्टिमला एरर आल्याने फाईलचा निपटारा होण्यास थोडा कालावधी लागला. मात्र, पंधरा दिवसांत गतीने फाईलचा निपटारा करण्यात आला आहे, अशी माहिती मुख्य लेखाधिकारी कार्यालयातून दिली.
नगरसेवक निधीतील प्रलंबित कामांसह शासकीय निधी, डीपीसी निधीतील प्रलंबित कामांवरून नुकतेच महानगरपालिकेत पदाधिकारी, नगरसेवकांनी तीव्र संताप व्यक्त केला. दप्तर दिरंगाईवरून नगरसेवकांनी असंतोष व्यक्त केला होता. या पार्श्वभूमीवर फाईलचा निपटारा गतीने होत असल्याचे एका पदाधिकार्यांनी सांगितले.
