कोल्हापूर : जयप्रभा स्टुडिओ बचाव कृती समितीकडून सामुदायिक आत्मदहनाचा इशारा देण्यात आला आहे. कोल्हापूरच्या छत्रपती शिवाजी महाराज चौकात अखिल भारतीय मराठी चित्रपट महामंडळाचे उपाध्यक्ष धनाजी यमकर यांनी हा इशारा दिला आहे. जयप्रभा स्टुडिओ शुटींग साठी खुला झालाचं पाहिजे या प्रमुख मागणीसाठी गेल्या 94 दिवसापासून अखिल भारतीय मराठी चित्रपट महामंडळ आणि कलाकारांच्या वतीनं आंदोलन सुरू आहे.
अनेक दिवसापासून आंदोलन सुरू असूनही मात्र शासनाकडून याची दखल घेतली नसल्यानं आता चित्रपट महामंडळ आक्रमक झाल आहे. आजपासून कोल्हापूर शहरात आंदोलनाचा धडाका सुरु करण्यात आला असून याची सुरुवात छत्रपती शिवाजी चौकात ठिय्या आंदोलनानं करण्यात आली. जयप्रभा स्टुडिओसाठी वेगवेगळ्या प्रकारे हे आंदोलन होणार असून वेळप्रसंगी सामूहिक आत्मदहन करु असा इशारा चित्रपट महामंडळाचे उपाध्यक्ष धनाजी यमकर यांनी दिला. यावेळी छत्रपती शिवाजी महाराज चौकात आंदोलकांनी जोरदार घोषणाबाजी करून परिसर दणाणून सोडला.
