खास प्रतिनिधी | गोपनीय खबऱ्या
मिरज शहरातील वाहतूक नियोजन करणे खूपच कठीण काम असल्याचे सामाजिक कार्यकर्ते वारंवार बोलून दाखवतात. मिरज शहर वाहतूक नियंत्रण शाखेचे अधिकारी सपोनि सुनील गिड्डे यांनी गेल्या काही वर्षात उत्कृष्ट काम करत त्याचे सुनियोजन केल्याचे दिसून आले. त्यांनी शहरातील गांधी चौकातील सिग्नल यंत्रणा सुद्धा सुरू केली. शिवाय व्हीआयपी दौरे, मिरवणुका, रॅली, यामध्ये प्रभावी कार्यपद्धती दाखवून दिली.
प्रशासकीय कारणास्तव सोमवारी रात्री उशिरा पोलिस अधीक्षकांनी काही अधिकाऱ्यांच्या तडकाफडकी बदल्या केल्याने सर्वत्र जोरदार चर्चा सुरू झाली आहे. वाहतूक नियंत्रण शाखा, मिरजचे सपोनि सुनील गिड्डे यांची संजयनगर पोलिस ठाण्यात तर मिरज ग्रामीण पोलीस ठाण्यातील सपोनि रणजीत तिप्पे यांची वाहतूक नियंत्रण शाखा मिरज येथे रात्री उशिरा पोलिस अधीक्षकांनी आदेश पारेषित करून बदली केली आहे.
मिरज शहरातील एकंदरित वाहतूक समस्येबाबत विचार केल्यास शाळा व शासकीय कार्यालयात ये जा करणाऱ्यांची वर्दळ आणि गांधी चौक ते महाराणा प्रताप चौकापर्यंत होणारी वाहतूक कोंडी यासह छ. शिवाजी महाराज रस्त्यावरील वाहनांचे बेकायदेशीर पार्किंग, शहर पोलिस ठाण्याच्या दारात दैनंदिन होणारे पार्किंग याकडे जाणीवपूर्वक लक्ष देऊन वाहतूक कोंडीची समस्या सोडवण्याचे आव्हान हे सहाय्यक पोलीस निरीक्षक रणजीत तिप्पे यांच्यासमोर असणार आहे.
