सांगली प्रतिनिधी | गोपनीय खबऱ्या
सांगली जिल्ह्यातील राजकारणात आता नवा संवाद पाहायला मिळणार आहे. शहरातील विविध विषय घेऊन रस्त्यावरची लढाई, आंदोलने, मोर्चे काढण्यात अग्रक्रमाने पुढाकार घेणारे, पश्चिम महाराष्ट्राचे आंबेडकरी चळवळीचे प्रमुख नेते डॉ. महेशकुमार कांबळे यांचा उद्या शनिवारी मिरज शहरातील आळतेकर हॉल याठिकाणी भाजप नेत्यांच्या उपस्थितीत पक्षप्रवेश होणार आहे.
मिरज शहरात शनिवारी भाजपचा कार्यकर्ता संवाद मेळावा, पदाधिकारी निवडी पार पडणार आहेत. याचवेळी मिरज शहर व ग्रामीण भागातील राजकारणात धुमाकूळ घालणाऱ्या दिग्गज नेत्यांचा पक्षप्रवेश होणार असल्याची माहिती सूत्रांकडून मिळाली.
यामध्ये विशेषतः कवठेपिरान येथील ज्येष्ठ नेते अनिल आमटवणें, डॉ. महेशकुमार कांबळे, युवा नेते दिगंबर जाधव, राष्ट्रवादीचे शाबाज कुरणे यांच्यासह ग्रामीण भागातील ग्रामपंचायत व सहकारी सोसायटीचे सदस्य – प्रमुख पदाधिकारी भाजप पक्षात प्रवेश करणार आहेत.
या पक्षप्रवेश सोहळ्यास मिरजेचे आमदार डॉ. सुरेश खाडे, आमदार सुधीर गाडगीळ, भाजप नेते व स्टार प्रचारक आमदार गोपीचंद पडळकर यांच्यासहित भाजपचे जिल्हाध्यक्ष व इतर पदाधिकारी उपस्थित असणार आहेत.
शहरात मोटारसायकल रॅली
पक्षप्रवेशाच्या अगोदर डॉ. महेशकुमार कांबळे यांच्याकडून शनिवारी सकाळी शहरात मोटारसायकल रॅलीचे भव्य आयोजन करण्यात आले असल्याचे समजते आहे.
