खास प्रतिनिधी | गोपनीय खबऱ्या
विटा येथील भाजपचे नेते माजी आमदार सदाशिवराव पाटील यांच्या घरासमोर मंतरलेले काळे उडीद, मोहरी व माती यांचे मिश्रण कागदाच्या पुडीतून टाकण्यात आला. हा प्रकार घरात समोरील सीसीटीव्ही कॅमेरामध्ये कैद झाला असून त्याआधारे संतप्त झालेल्या कार्यकर्त्यांनी संशयित तरुणासह एका बंगाली बाबूचा शोध घेऊन त्यांना चोप देत धिंड काढून पोलिसांच्या ताब्यात दिले.
भाजपचे नेते माजी आमदार सदाशिवराव पाटील यांच्या घरासमोर सोमवारी दुपारी वर्दळ कमी असल्याचा फायदा घेत कोणी पाहणार नाही याची दक्षता घेत दुचाकीवरून आलेल्या दोघांपैकी एकाने कागदी पुडी तून काही वस्तू घरासमोर टाकून पलायन केले. मात्र ही घटना सीसीटीव्ही कॅमेऱ्यात कैद झाली.
या माहितीच्या आधारे दोघांचा शोध घेतला असता यापैकी एकजण स्थानिक व एक बंगाली असल्याचे आढळले. दोघांना चोप देत धिंड काढून पोलिसांच्या ताब्यात देण्यात आले. या प्रकरणी जादूटोणाविरोधी कायद्यानुसार गुन्हा दाखल करण्याची प्रक्रिया सुरू आहे.
