खास प्रतिनिधी | गोपनीय खबऱ्या
काय सांगताय…चक्क ६ पती-पत्नी निवडणुकीच्या रिंगणात, सांगली पालिकेच्या निवडणुकीची राज्यभर चर्चा! सांगली, मिरज आणि कुपवाड शहर महानगरपालिकेच्या निवडणुकीत एक अनोखा ट्रेंड दिसून येत आहे.
तब्बल सहा दाम्पत्य निवडणुकीच्या रिंगणात उतरले असून, ते विविध प्रमुख राजकीय पक्षांचे प्रतिनिधित्व करत आहेत. यात ठाकरे शिवसेना, शिंदेंची शिवसेना, काँग्रेस, अजित पवारांची राष्ट्रवादी काँग्रेस, भाजप आणि अपक्ष उमेदवारांचा समावेश आहे. काही उमेदवारांनी त्यांची लढाई केवळ पदासाठी नसून विकासासाठी असल्याचे स्पष्ट केले आहे. या वॉर्डाचा विकास साध्य करण्याचा त्यांचा निर्धार आहे.
मिरजेतील प्रभाग क्रमांक पाच मध्ये निवडणुकीच्या रिंगणात उभे राहिलेले दांपत्य चर्चेत आले आहे. माजी नगरसेवक संजय मेंढे व त्यांच्या पत्नी बबीता मेंढे यांच्या नावाची जोरदार चर्चा सुरू आहे. तर प्रभाग क्रमांक २० मधून संतोष कोळी हे राष्ट्रवादी शरदचंद्र पवार पक्षातून निवडणुकीच्या रिंगणात आहेत. तर त्यांच्या पत्नी प्रेरणा संतोष कोळी ह्या प्रभाग क्रमांक दोन मध्ये निवडणूक लढवीत आहेत.
दरम्यान, महाराष्ट्रातील राजकीय घडामोडींमध्ये मुंबई महानगरपालिका निवडणुकीच्या प्रचारालाही वेग आला आहे. खासदार मनोज तिवारी मुंबईतील प्रभाग क्रमांक ३ मधील भाजप उमेदवार प्रकाश दरेकर यांच्यासाठी प्रचार सभा घेणार आहेत. तसेच, शिंदे सेनेचे स्टार प्रचारक गोविंदा प्रभाग क्रमांक १ मधील प्रचार रॅलीमध्ये सहभागी होणार आहेत. हे सर्व स्टार प्रचारक महायुतीचे प्रतिनिधित्व करणार आहेत. यामुळे स्थानिक स्वराज्य संस्थांच्या निवडणुकांमध्ये कार्यकर्त्यांसह सेलिब्रिटींचाही सहभाग दिसून येत आहे.
