खास प्रतिनिधी | गोपनीय खबऱ्या
सरत्या वर्षाला निरोप आणि नववर्षाचे स्वागत करताना वाहतूक नियमभंग केल्याबद्दल ११८३ जणांच्या खिशाला ८ लाख १९ हजारांची कात्री लागली. जिल्ह्यातील ६५ ठिकाणी पोलीसांनी झाडाझडती घेतली असता न्यायालयाचे वॉरंट चुकवणारे ९८ हाती लागले.
पोलीस अधिक्षक संदीप घुगे यांनी दिनांक बुधवारी रात्री १० ते आज पहाटे ५ वाजेपर्यंत जिल्हयात ऑल आऊट ऑपरेशन राबवून नाकाबंदी व कोंबींग करुन नियम मोडणाऱ्या इसमांवर कारवाई करण्याचे आदेश दिले होते.
या आदेशाप्रमाणे सांगली जिल्हयातील ६ उपविभागात सबंधित उपविभागाचे उपविभागीय पोलीस अधिकारी यांचे मार्गदर्शनाखाली एकुण ६५ ठिकाणी नाकाबंदी आयोजित करुन कारवाई करण्यात आली. या कारवाईमध्ये ६४ पोलीस अधिकारी व ४६४ पोलीस सहभागी झाले होते.
नाकाबंदी दरम्यान एकुण ३६५९ वाहन चेक करुन त्यापैकी दारु पिवुन वाहन चालविणाऱ्या इसमांवर एकुण ८७ व मोटार वाहन कायद्यातंर्गत १०९६ व्यक्तीवर कारवाई करुन ८ लाख१९ हजार ३६५ रुपये दंड वसूल करण्यात आला. अवैध दारु विक्री करणाऱ्यावर महाराष्ट्र दारुबंदी कायद्याअंतर्गत ५७ गुन्हे दाखल करण्यात आले. न्यायालयाकडील पकड वॉरंट मधील ४० व जामीनपात्र वॉरंट मधील ५८ आरोपींना पकडण्यात आले.
