जत प्रतिनिधी | गोपनीय खबऱ्या
जत तालुक्याला वरदान ठरणाऱ्या म्हैसाळ विस्तार योजनेसाठी शिवसेनेचे नेते एकनाथ शिंदे यांनी मुख्यमंत्री असताना दोन हजार कोटीचा निधी दिला. तसेच जत शहराच्या पिण्याच्या पाण्यासाठी वरदान ठरणारी ७८ कोटी रुपयांची नळपाणी पुरवठा योजना शिवसेनेमुळे मंजुर झाली आहे. जत तालुक्यातील सर्व विकास कामे ही शिवसेनेमुळे झाली आहेत ही वस्तुस्थिती आहे. त्यामुळे ‘पोरगं एकाला झालं म्हणून पेढे वाटायचे दुसऱ्याने’ असा खोचक टोला शिवसेनेचे नूतन जिल्हाप्रमुख संजय विभुते यांनी भाजपला लगावत आता पर्यंत तालुक्याला शिवसेनेमुळे निधी मिळाल्याचा गौप्यस्फोट पत्रकार परिषदेत केला. यामुळे स्थानिक स्वराज्य संस्था निवडणुकीत भाजप व शिवसेना शिंदे गटात मिठाचा खडा पडण्याची शक्यता निर्माण झाली आहे.
यावेळी शिवसेनेचे तालुकाप्रमुख अंकुश होवाळे, प्रवीण अवरादी, सचिन मदने, मिलिंद टोणे , विजय दोरकर, दिलीप चव्हाण आदी उपस्थित होते. नूतन जिल्हाप्रमुख संजय विभुते म्हणाले की, विधानसभा निवडणुकीत शिवसेनेने भाजपचे प्रामाणिक काम केले होते. त्याची परतफेड करण्याची वेळ आता भाजपवर आली आहे. राज्यात भाजप हा शिवसेनेचा मोठा भाऊ आहे. स्थानिक स्वराज्य संस्थांच्या निवडणुकांसाठी युतीचा प्रस्ताव भाजपकडुन अद्यापही आला नाही. शिवसेनेची ताकद सांगली जिल्ह्यात मोठ्या प्रमाणात आहे. जर भाजपने युतीमध्ये सन्मानपूर्वक जागा न सोडल्यास शिवसेना स्वतंत्र लढण्यास तयार आहे. विकासाचा दृष्टिकोन शिवसेनेने नेहमीच ठेवला आहे. उपमुख्यमंत्री एकनाथ शिंदे यांनी जत तालुक्याला भरभरून निधी दिला आहे. त्यामुळे जत नगर परिषद , जिल्हा परिषद, पंचायत समिती निवडणुकीत शिवसेनेचा भगवा फडकल्याशिवाय राहणार नाही, असे शिवसेनेचे नूतन जिल्हाप्रमुख संजय विभुते म्हणाले.
