खास प्रतिनिधी | गोपनीय खबऱ्या
इचलकरंजी येथील दि सोशल को. ऑप. लि., इचलकरंजी या संस्थेच्या कामकाजात गंभीर बाबी निदर्शनास आल्याने संस्थेचे संचालक मंडळ बरखास्त करुन प्रशासक म्हणून गणेश विश्वास कुमठेकर यांची नियुक्ती करण्यात आली आहे. याबाबतचे आदेश सहकारी संस्था हातकणंगले उपनिबंधक डॉ. एस. एन. जाधव यांनी दिलेले आहेत.
या आदेशाविरुध्द विद्यमान संचालक यांनी विभागीय सहनिबंधक सहकारी संस्था कोल्हापूर यांच्याकडे अपिल केलेली होती. या अपिलकामी दोन्ही बाजूचे लेखी व तोंडी युक्तीवाद ग्राह्य मानून विभागीय सहनिबंधक संस्था कोल्हापूर डॉ. महेश कदम यांनी अपिलंट यांनी केलेली अपिल नामंजूर करून हातकणंगले उपनिबंधक डॉ. एस.एन. जाधव यांचा आदेश कायम ठेवणेत आला आहे. याबाबती माहिती सोशल बचाव कृती समितीच्यावतीने पत्रकाद्वारे देण्यात आली.
संस्थेच्या गैरकारभारास कंटाळून दि सोशल सोसायटीच्या संचालकांनी दि सोशल बचाव कृती समितीच्या माध्यमातून राजीनामा दिला होता. तसेच सन २०२३-२४ सालातील लेखापरिक्षण अहवाल उपनिबंधक यांचेकडे मुदतपूर्व सादर केला नव्हता. यासह संस्थेच्या अन्य कामकाजात गंभीर वित्तीय बाबी उपनिबंधक यांच्याकडे निदर्शनास आल्या. यामुळे त्यांनी प्रशासक नियुक्त करुन संस्थेचे चेअरमन, व्हा. चेअरमन व सर्व संचालक मंडळ बरखास्त करून पुढील ५ वर्षाकरिता अपात्र केले. तसेच प्रशासक यांनी संस्थेच्या समितीची निवडणूक प्रक्रिया ६ महिन्याच्या आत राबवून नविन पदभार सोपवावा, असे आदेश दिलेला आहे.
