खास प्रतिनिधी | गोपनीय खबऱ्या
शहरातील सांगली-मिरज रस्त्यावरील असलेल्या गेस्ट हाऊस परिसरात चालत निघालेल्या वृद्धेला भरधाव चारचाकीने जोराची धडक दिली होती. या अपघातात गंभीर जखमी झालेल्या विमल रामचंद्र भोसले (वय ७० रा.चांदणी चौक, सांगली) यांचा आज (ता. ३१) उपचारादरम्यान मृत्यू झाला.
हा अपघात हा १३ मे रोजी सकाळी दहा वाजण्याच्या सुमारास झाला. याप्रकरणी ऋतिक उत्तम तरटे (रा. सांगली) यांनी विश्रामबाग पोलिस ठाण्यात फिर्याद दिली. त्यांच्या फिर्यादीवरून पोलिसांनी संशयित चारचाकीचालक शंकर कुंडलिक मिरजे (रा. कागवाड, कर्नाटक) यांच्यावर गुन्हा दाखल केला आहे.
पोलिसांनी सांगितले की, मृत विमला भोसले या आपल्या कुटुंबीयांसह शहरातील चांदणी चौक परिसरात राहत होत्या. त्या सांगली मिरज रस्त्यावरून चालत निघाल्या होत्या. यावेळी गेस्ट हाऊस परिसरात त्या आल्या असता पाठीमागून संशयित चारचाकी चालक शंकर मिरजे याने त्यांच्या ताब्यातील चारचाकी (एमएच १२, एचव्ही ४४४१) भरधाव वेगात घेऊन आला. त्याने भोसले यांना पाठीमागून जोराची धडक दिली.
या अपघातात विमल भोसले या गंभीर जखमी झाल्या. त्यांना तातडीने उपचारासाठी दाखल करण्यात आले. रुग्णालयात उपचार सुरू असतानाच भोसले यांचा शनिवारी पहाटे मृत्यू झाला. याप्रकरणी तरटे यांनी विश्रामबाग पोलिस ठाण्यात फिर्याद दिली. त्यानुसार गुन्हा नोंद करण्यात आला.
