खास प्रतिनिधी | गोपनीय खबऱ्या
कवठेमहांकाळ तालुक्यातील लिंबेवाडी-रांजणी येथे काठ्या व कुर्हाडीच्या मारहाणीत जखमी झालेल्या तरुणाचा रुग्णालयात उपचार सुरू असताना मृत्यू झाला. सचिन शिवाजी वाघमोडे (वय ३५, रा.लिंबेवाडी) असे मृताचे नाव आहे. याबाबत मृत सचिन यांची पत्नी नम्रता यांनी कवठेमहांकाळ पोलिस ठाण्यात सातजणांविरुद्ध फिर्याद दाखल केली आहे.
रांजणी गावालगतच्या लिंबेवाडी येथील सचिन वाघमोडे हे पत्नी नम्रता यांच्याशी भांडत असताना, घराशेजारी राहणारे संशयित भाऊसाहेब वाघमोडे, राजू वाघमोडे, साहेबराव वाघमोडे, नाना वाघमोडे, दादासाहेब वाघमोडे, पोपट वाघमोडे, गजानन वाघमोडे यांनी, सचिन हा आपल्यालाच शिवीगाळ करत असल्याचा समज करून घेऊन त्यांना काठ्या व कुर्हाडीने मारहाण करून गंभीर जखमी केले होते. गंभीर जखमी अवस्थेत सचिन यांच्यावर मिरज येथील खासगी रुग्णालयात उपचार सुरू होते.
सात दिवस उपचारानंतर अखेर सचिन यांचा मृत्यू झाला. शवविच्छेदनाचा अहवाल प्राप्त झाल्यानंतर पुढील गुन्हा दाखल करण्यात येणार आहे, अशी माहिती पोलिसांकडून देण्यात आली.
