खास प्रतिनिधी | गोपनीय खबऱ्या
आम्ही कोणाला अवैध धंद्यांचा परवाना देत नाही, तसेच कधीही अवैध धंदेवाल्यांना पाठीशी घालत नाही. तासगाव तालुक्यातील अवैध धंद्यांचे समूळ उच्चाटन करण्यासाठी आवश्यक सर्व उपाययोजना करा, असे निर्देश तासगाव-कवठेमहांकाळ विधानसभा मतदारसंघाचे आमदार रोहित पाटील यांनी सोमवारी तासगाव येथे दिले.
तब्बल 24 वर्षांनंतर तासगाव तालुक्याची आमसभा झाली. सोमवारी सकाळी 11 वाजता सुरू झालेली आमसभा रात्री साडेआठ वाजेपर्यंत सुरू होती. सकाळी सर्व विभागांच्या वरिष्ठ अधिकार्‍यांनी विभागाचा आढावा सादर केला. यानंतर ग्रामस्थ आणि नागरिकांनी विचारलेल्या प्रश्नांची उत्तरे अधिकार्‍यांनी दिली. शेवटी अध्यक्ष तथा आमदार रोहित पाटील यांच्या परवानगीने ऐनवेळी आलेल्या प्रश्नावर चर्चा करण्यात आली. आमसभेला तहसीलदार अतुल पाटोळे, पोलिस निरीक्षक सोमनाथ वाघ, गटविकास अधिकारी तथा सचिव किशोर माने, बांधकाम विभागाचे उपविभागीय अभियंता प्रशांत हुद्दार, मुख्याधिकारी यांच्यासह प्रमुख विभागाचे वरिष्ठ अधिकारी, आजी-माजी पदाधिकारी, सरपंच, उपस्थित होते.
